धनगढी । कैलाली जिल्ला अदालतले लम्कीचुहा नगरपालिका-१ का २३ वर्षीय भुपेन्द्र बडुवाल हत्या घटनाको फैसला सुनाएको छ । जिल्ला अदालतले बडुवाल हत्या घटनाको मंगलबार फैसला सुनाएको हो ।
उक्त घटनामा जिल्ला अदालतले १३ जनालाई जन्मकैद हुने फैसला सुनाएकाे छ ।
जिल्ला न्यायाधीश गाेकुल निराैलाकाे एकल इजलासले प्रतिवादीहरु नवीन रावल,आर्यान देवकोटा, रोशनबहादुर शाही, अनुज भन्ने चिरन्जिवीजंग शाही, रोहित आले र हिमाल शाही गरि ६ जना प्रतिवादीहरुलाई मुलुकी अपराध संहिता, २०७४ को दफा ४१ बमोजिम जीवित रहेसम्म (आजीवन) जन्मकैदको सजाय हुने फैसला गरेको छ ।
त्यस्तै,प्रतिवादीहरु मदन शाही, हेमन्त शाही, धिरज भन्ने दिपेन्द्र शाही, गोलु भन्ने निशान्त मल्ल र शोहन शाह गरि ५ जनालाई मुलुकी अपराध संहिता, २०७४ को दफा १७७ (१) बमोजिम जन्मकैद सजाय हुने फैसला गरेको छ।
त्यसै,प्रतिवादीहरु लोकेन्द्र कुवँर र सविनजंग शाहीलाई अभियोग दावी बमोजिम जन्मकैदको सजाय हुने फैसला भएको कैलाली जिल्ला अदालतले जनाएको छ ।
अदालतले सो मुद्दामा सुरुदेखि फरार रहेका प्रतिवादी लोकजंग शाहीको हकमा मुलुकी फौजदारी कार्यविधी संहिता,२०७४ को दफा ९८ बमोजिम मुल्तवीमा राख्ने फैसला गरेको छ ।
प्रतिवादीहरु अशोक रावल, महेश रावल, जयन्द्र शाह, विकास खड्का, प्रविन रिमाल, बिकास सेरचन थकाली र कपिल श्रेष्ठले सफाई पाएका छन् ।
सजाय तोकिएका १३ जना प्रतिवादीहरूले संयुक्त रूपमा रु १५ लाख पीडितलाई दामासाहीका आधारमा क्षतिपूर्ति दिनुपर्ने आदेश पनि भएको छ ।
उनीहरूबाट कानुन बमोजिम जनही २ हजार ८ सयका दरले पीडित राहत कोषमा रकम दाखिला गर्नुपर्ने ठहर गरिएको छ ।
बडुवालको २०७८ कात्तिक २३ गते टीकापुर नगरपालिका–१ मा हत्या भएकाे थियो ।
२०७८ फागुन २६ गते जिल्ला सरकारी वकिलको कार्यालयले जिल्ला अदालतमा २१ जनाविरुद्ध कर्तव्य ज्यान सम्बन्धी मुद्दा दायर गरेको थियो ।
