धनगढी । श्रम,रोजगार तथा सामाजिक सुरक्षामन्त्री राजेन्द्रसिंह भण्डारीले युवामा भएको ऊर्जालाई ठीकसँगले प्रयोग गर्नुपर्ने बताएका छन ।
सोमबार नेपाल युथ फाउन्डेसनसँगको सहकार्यमा धनगढी उपमहानगरपालिकाले वडा नम्बर १८ फूलबारीमा सञ्चालन गरिरहेको भोकेसनल स्कुलको नवनिर्मित भवन उद्घाटन कार्यक्रममा बोल्दै उनले यस्तो बताएका हुन्
उनले युवाहरूको शक्तिलाई सही सही समयमा प्रयोग गर्न नसके बाटो बिराउने बताए ।
उनले युवालाई सीपसँगै रोजगारी पनि दिनुपर्ने बताउँदै राज्यले अवसरको सुनिश्चिता गर्नुपर्ने बताए ।
उनले राज्यका नीतिभित्र पनि अवसर भएको बताउँदै त्यसको प्रभावकारी कार्यान्वयन गर्न आवश्यक रहेको बताए ।
कार्यक्रममा बोल्दै धनगढी उपमहानगरपालिकाका नगर उपप्रमुख कन्दकलाकुमारी रानाले सुदूरपश्चिमका सबै जिल्लाहरुलाई समेटेर तालिम सञ्चालन भइरहेको बताउँदै अन्य प्रदेशबाट पनि तालिममा सहभागी रहेको बताइन ।
उनले पौने चार बिघा जग्गामा करिब ६ करोड लगानीमा भौतिक संरचनाहरु निर्माण गरि तालिम सञ्चालन भइरहेको बताइन ।
धनगढी उपमहानगरपालिका-१८ का अध्यक्ष भुवन रिजालले युवालाई बदलिदो परिस्थिति र आकांक्षाअनुसारको सीप दिने उदेश्यले तालिम सञ्चालन गरिएको बताए ।
उनले युवालाई समयानुकूल सीप दिन आवश्यक भएको बताए
युथ फाउन्डेसनका रिश्वराम गोर्खालीले फाउन्डेसनले भवन निर्माण र उपकरण खरिद गरि गरिब ५ करोड लगानी गरेको बताए
उनले अहिले इलेक्ट्रिकल,प्लम्बिङ,कार्पेन्टर र वेल्डिङ गरी चारवटा तालिमहरू सञ्चालन भइरहेको बताउँदै भविष्यमा माग अनुसार अन्य तालिमहरू पनि सञ्चालन गरिने बताए ।
कार्यक्रममा धनगढी उपमहानगरपालिकाका नगरप्रमुख गोपाल हमाल,कर्मचारी लगायतको उपस्थिति रहेको थियो ।
