धनगढी । नेपाली कम्युनिष्ट पार्टीका नेता तथा कैलाली क्षेत्र नं. ५ का उम्मेदवार प्रेमबहादुर आलेले आफू सेवा भावले राजनीतिमा आएको बताए ।

शनिबार धनगढी उपमहानगरपालिका–१४ घाङलटोलमा आयोजित जनभेटघाट कार्यक्रममा बोल्दै उनले यस्तो बताएका हुन् ।

उनले भने ‘सेवाको भावले म राजनीतिमा आएको छु । जनताप्रति सधै उत्तरदायी हुन्छु । सधै जनताको सेवालाई प्राथमिकता हुन्छु ।’

पूर्वमन्त्रीसमेत रहेका आलेले जनताको सेवा गरेकै कारण डोटीबाट तीन पटक लगातार जित हासिल गरेको बताउँदै यसपटक कैलाली क्षेत्र नं. ५ का जनताले आफूलाई जिताउने विश्वास व्यक्त गरे ।

उनले त्यहाँका जनताले राखेका बुद्धविहार निर्माणको माग पूरा गर्र्ने प्रतिवद्धता व्यक्त गरे । उनले भने ‘चाहे रोजगारी होस्,चाहे विकास निर्माण होस् यी सबै कुरालाई निश्पक्षसाथ पूरा गर्न लाग्नेछु, भोलि जितेर गए यो पार्टी उ पार्टी भन्ने छैन् । सबैलाई समान व्यवहार गर्नेछु ।’

कार्यक्रममा बोल्दै उनले नेकपाको उम्मेदवारी पर्नासाथ अन्य उम्मेदवारहरु आत्तिएका बताउँदै कतिपयले चुनाव नभए हुन्थ्यो भन्ने प्रार्थना गरिरहेको र फागुन २१ को निर्वाचन कसैले पनि रोक्न नसक्ने बताए ।

नेता आले शनिबार नै नेपाल मगर संघले धनगढी–४ मा आयोजना गरेको भेटघाट कार्यक्रमसमेत सरिक भएका थिए । सो कार्यक्रममा बोल्दै उनले पार्टी भन्दा माथि उठेर काम गर्नुपर्ने बेला आएको बताए ।

उनले भने ‘आज देशमा भ्रष्टाचारको अन्त्य,सुशासन कायम,विकास निर्माण र युवालाई रोजगारी सिर्जना गर्नुपर्ने अवस्था छ । बिगतमा मन्त्री हुँदा समस्या परेकालाई कहिल्यै कुन पार्टी भनेर सोधेन र सक्दो सहयोग गरेको छु ।’
उनले त्यहाँ मगर संघको भवन,मगर संग्रहालय निर्माणका लागि पहल गर्ने प्रतिवद्धता व्यक्त गरे ।

उनले आजनै धनगढी उपमहानगरपालिका–वडा नं. १० मा निर्वाचन परिचालन सचिवालय उद्घाटन गरेका छन् । सचिवालय उद्घाटन गर्दै उनले आफू निर्वाचित भए वडा नं. १० मा रहेको मोहना नदी कटानको समस्या समाधानका डटेर लाग्ने बताउँदै ढुक्क हुन सबैलाई आग्रह गरे । उनले भने ‘हरेक उम्मेदवारले यस्तै भन्छन् भन्ने लाग्छ होला तर बिगतमा मैले गरेका काम जनताले अहिले पनि सम्झन गरेका छन् । बन्दुकबाट निस्केको गोली प्रेम आलेको मुखबाट निस्केको बोली एक इञ्च फरक जादैन् ।’

त्यस्तै उनले बेरोजगारी समस्या समाधान,किसानका हकहित,खानेपानी,सिँचाइ लगायतका समस्या समाधान गर्न लाग्ने बताए ।

यो संगै शनिबार वडा १५ को निर्वाचन परिचालन सचिवालय उद्घाटन,जुगेडा च्याउ उद्योगको अवलोकन, फूलावारीस्थित दुना टपरी उद्योगको अवलोकन गरेका थिए ।

आलेले कैलाली क्षेत्र नं. ५ मा आफ्ना चुनावी गतिविधिलाई तीब्र बनाएका छन् । डोटीबाट २०७० सालको संविधान सभा, ०७४ सालको प्रतिनिधि सभा सदस्य र २०७९ सालको प्रतिनिधिसभा सदस्य निर्वाचनमा जितेका आले आसन्न फागुन २१ गते हुने प्रतिनिधिसभा सदस्य निर्वाचनका लागि कैलाली–५ बाट उम्मेदवार बनेका छन् ।