धनगढी । नेपाली कम्युनिष्ट पार्टीले कैलाली क्षेत्र नं. ४ को निर्वाचन लक्षित निर्वाचन परिचालन मुल समिति संयोजकको जिम्मेवारी संविधानसभा सदस्य एवं पार्टीका केन्द्रीय सदस्य कृष्णकुमार चौधरीलाई दिएको छ ।
शनिबार बसेको बैठकले चौधरीको नेतृत्वमा १ हजार ५१ सदस्यीय मुल समिति गठन गरेको जनाइएको छ । त्यस्तै, निर्वाचन अभियानलाई प्रभावकारी बनाउन मुल समितिसँगै विभिन्न उपसमिति गठन गरिएको नेपाली कम्युनिष्ट पार्टीका युवा नेता उद्धव भट्टराईले जानकारी दिए ।
आर्थिक परिचालन उपसमितिको संयोजकमा सुदूरपश्चिम प्रदेशका पूर्वमुख्यमन्त्री दीर्घबहादुर सोडारी,प्रचारप्रसार उपसमितिको संयोजकमा पूर्वमन्त्री एवं नेकपाका केन्द्रीय सदस्य कृष्णराज सुवेदी,वार्ता संवाद उपसमिति संयोजकमा केन्द्रीय सदस्य लक्षीराम आचार्य,अनुगमन उपसमिति संयोजकमा पूर्वराज्यमन्त्री एवं केन्द्रीय सदस्य चुनकुमारी चौधरी र सूचना तथा सञ्चार उपसमिति संयोजकको जिम्मेवारी युवा नेता उद्धव भट्टराईलाई दिइएको जनाइएको छ ।
त्यस्तै,पालिकास्तरीय निर्वाचन परिचालन समितिहरु पनि गठन गरिएको नेता भट्टराईले जानकारी दिए । उनका अनुसार गोदावरी नगर निर्वाचन परिचालन समिति संयोजकमा लक्ष्मण कुँवर,गौरीगंगा नगर निर्वाचन परिचालन समिति संयोजकमा भक्तबहादुर विश्वकर्मा र चुरे गाउँपालिका निर्वाचन परिचालन समिति संयोजकको जिम्मेवारी लोकबहादुर सारुलाई दिइएको छ । ।
त्यस्तै,निर्वाचन परिचालन मुलसमिति कार्यालय संयोजकमा धर्मसिंह कुँवर, युवा परिचालन उपसमिति संयोजकमा नवीन धामी,थारु मक्ति मोर्चा संयोजकमा तिलक चौधरी,उम्मेदवार टोली संयोजकमा बलबहादुर महता,आदिवासी जनजाति सम्पर्क संयोजकमा लोकबहादुर पल्लीमगर,महिला परिचालन उपसमिति संयोजकमा गीता सोडारी र दलित मुक्ति मोर्चा परिचालन संयोजकमा जगत आउजी र विद्यार्थी परिचालन उपसमिति संयोजकको जिम्मेवारी उमेश कँडेललाई दिइएको उनले जानकारी दिए ।
यस्तै, बैठकले माघ २५ गतेभित्र पार्टीका आन्तरिक भेला तथा बैठकहरु सम्पन्न गरिसक्ने निर्णय समेत गरेको उनले जानकारी दिए ।
आगामी फागुन २१ गते हुने प्रतिनिधिसभा सदस्य निर्वाचनका लागि कैलाली क्षेत्र नं. ४मा नेपाली कम्युनिष्ट पार्टीकातर्फबाट राष्ट्रियसभा सदस्य एवं नेकपाका नेता हरिराम चौधरी ‘उत्सव’ उम्मेदवार रहेका छन् ।
उनले सो क्षेत्रमा चुनावी अभियानलाई तीब्रता दिँदै निर्वाचन क्षेत्रभित्रका ३० वटा वडामा निर्वाचन परिचालन कार्यालय समेत स्थापना गरिसकेको जनाइएको छ ।
