धनगढी । विज्ञान, प्रविधि तथा अनुसन्धान क्षेत्रमा योगदान पुर्याएका चार जना युवा वैज्ञानिकलाई सुदूरपश्चिम प्रदेशका मुख्यमन्त्री कमलबहादुर शाहले सम्मान गरेका छन ।
आइतबार धनगढीमा प्रदेश युवा परिषद्ले आयोजना गरेको ‘युवा वैज्ञानिक प्रोत्साहन कार्यक्रम–२०८३’ मा मुख्यमन्त्री शाहले उनीहरुलाई नगद पुरस्कार र कदरपत्र सहित सम्मान गरेका हुन ।
सम्मानित हुने युवा वैज्ञानिकहरूमा कैलालीको टीकापुरका अरुण लुहार, धनगढीका इन्द्र ओझा, गोदावरीकी बिन्दु पन्त र बाजुराको त्रिवेणीका प्रकाशबहादुर साउँद रहेका छन्।
यसअघि साउन २७ गते अन्तर्राष्ट्रिय युवा परिषद् २०२५ को अवसरमा आयोजित कार्यक्रममा मुख्यमन्त्री शाहले नवप्रवर्तन क्षेत्रमा क्रियाशील युवाहरूलाई सम्मान गर्ने घोषणा गरेका थिए ।
कार्यक्रममा बोल्दै मुख्यमन्त्री शाहले सूचना तथा प्रविधि क्षेत्रलाई युवासँग जोड्नुपर्नेमा जोड दिँदै सरकारले त्यसका लागि आवश्यक सहयोग गर्ने बताए । उनले समाज रूपान्तरण, समाजको सकारात्मक परिवर्तन र समाजलाइ सही दिशातर्फ अघि बढ्न युवाहरूको सक्रिय भूमिका आवश्यक रहेको उल्लेख गरे।
प्रदेश युवा परिषद्का कार्यकारी उपाध्यक्ष गजेन्द्रबहादुर साउदको अध्यक्षतामा सम्पन्न कार्यक्रममा सामाजिक विकास राज्यमन्त्री मधु भारती लगायतका वक्ताहरूले पनि युवाहरूको क्षमता अभिवृद्धि र नवप्रवर्तन प्रवर्द्धनका लागि राज्यले अझ सक्रिय भूमिका खेल्नुपर्ने धारणा व्यक्त गरेका थिए ।
