धनगढी । सुदूरपश्चिम प्रदेशमा करिब ४० प्रतिशत रोपाइँ सम्पन्न भएको छ । प्रदेशभर मध्यअसारसम्म ३९ दशमलव ८० प्रतिशत रोपाइँ भएको कृषि विकास निर्देशनालय डोटीले जनाएको छ ।
प्रदेश नौ जिल्लामा धान रोपाइँ हुने कुल क्षेत्रफल एक लाख ५४ हजार नौ सय ५० हेक्टर रहेकामा हालसम्म ६१ हजार ६ सय ७२ हेक्टर क्षेत्रफलमा रोपाइँ भएको निर्देशनालयका सूचना अधिकारी ज्ञानराज कँडेलले जानकारी दिए ।
उनका अनुसार कैलालीमा ६६ हजार ८ सय २० हेक्टर क्षेत्रफलमा धान रोपाइँ हुने गरेकामा २५ हजार ३ सय ९१ हेक्टरमा,कञ्चनपुरमा ४८ हजार ४ सय ९६ हेक्टरमध्ये २१ हजार ८ सय २३ हेक्टरमा,अछाममा १० हजार ७ सय हेक्टरमध्ये ३ हजार ८ सय ८० हेक्टरमा र डोटीमा ६ हजार ४ सय २६ हेक्टरमध्ये ९ सय ६४ हेक्टर क्षेत्रफलमा रोपाइँ भएको भएको छ ।
त्यस्तै,बझाङमा ६ हजार ३ सय हेक्टर क्षेत्रफलमध्ये २ हजार ६ सय ४६ हेक्टरमा,बैतडीमा ५ हजार १ सय २५ हेक्टर क्षेत्रफलमध्ये २ हजार ५० हेक्टरमा,बाजुरामा ३ हजार ९ सय ३ हेक्टरमध्ये १ हजार ८ सय ३४ हेक्टरमा,डडेल्धुरामा ३ हजार ६ सय २० हेक्टरमध्ये ९ सय ९६ हेक्टरमा र दार्चुलामा ३ हजार ४ सय ८० हेक्टरमध्ये २ हजार ८८ हेक्टर क्षेत्रफलमा रोपाइँ भएको सूचना अधिकारी कँडेलले जानकारी दिए ।
