धनगढी । कैलालीको लम्कीचुहा नगरपालिका–२ स्थित जनचेतना आधारभूत विद्यालयबाट मंगलबार बेपत्ता भएकी ६ वर्षीया मनिषा बिक मृत अवस्थामा फेला परेकी छन्।
मनिषा बुधबार बिहान लम्कीचुहा नगरपालिका–५ चौरीस्थित रोरा खोलाको किनारमा मृत अवस्थामा फेला परेको प्रहरीले जनाएको छ।
जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) योगेन्द्र तिमिल्सिनाका अनुसार लम्कीचुहा नगरपालिका–४ बस्ने मनिषा जनचेतना आधारभूत विद्यालयको शिशु कक्षामा अध्ययनरत थिइन्। मंगलबार बिहान करिब ७ बजे उनका अभिभावकले उनलाई विद्यालयमा छाडेका थिए।
विद्यालयबाट बालिका सम्पर्कविहीन भएको र घर तथा आफन्तकहाँ पनि नपुगेको जानकारी प्राप्त भएपछि इलाका प्रहरी कार्यालय लम्कीका प्रहरी निरीक्षक जयबहादुर चन्द र प्रहरी निरीक्षक कविराज रोकायाको नेतृत्वमा छुट्टाछुट्टै टोली परिचालन गरी खोजी गरिएको थियो। खोजतलासका क्रममा उनको शव रोरा खोलाको किनारमा फेला परेको प्रहरीले जनाएको छ ।
प्रहरीका अनुसार मंगलबार परेको वर्षाका कारण रोरा खोलामा पानीको बहाव बढेको थियो। प्रारम्भिक अनुसन्धानका आधारमा विद्यालयबाट निस्किएपछि एक्लै घर फर्किने क्रममा खोला तर्ने प्रयास गर्दा उनी बगेको हुन सक्ने आशंका गरिएको छ। घटनाबारे थप अनुसन्धान भइरहेको प्रहरीले जनाएको छ।
