धनगढी । सुदूरपश्चिम प्रदेश सरकारले ल्याएको आर्थिक वर्ष २०८३र८४ को बजेट प्रस्तुत भएको करिब ३ हप्तापछिमात्रै प्रदेशसभामा टेबल हुने भएको छ। बिहीबार बसेको कार्यव्यवस्था परामर्श समितिको बैठकले यही असार २३ गते बिहान ११ बजे बस्ने प्रदेश सभा बैठकमा बजेट छलफलका लागि पेश गर्ने निर्णय गरेको छ।
सभामुख भीमबहादुर भण्डारीका अनुसार २३ गतेको बैठकमा सरकारले बजेट टेबल गरेपछि मात्रै त्यसमाथि औपचारिक छलफलको प्रक्रिया अघि बढ्नेछ। असार १ गते आर्थिक मामिला मन्त्री विक्रमसिंह धामीले ३७ अर्ब ७० करोडको बजेट सार्वजनिक गरे पनि राजनीतिक खिचातानीका कारण हालसम्म छलफल सुरु हुन सकेको थिएन।
बजेटलाई लिएर सत्तारुढ गठबन्धनभित्रै ठूला मतभेद देखिएको छ। सत्ता साझेदार दल नेकपा एमालेले यथास्थितिमा बजेट पारित गर्न नसकिने स्पष्ट पारेको छ।
मुख्यमन्त्री कमल बहादुर शाहको आफ्नै दल नेपाली कांग्रेसभित्र पनि बजेटलाई लिएर असन्तुष्टि चुलिएको छ। ५३ सदस्यीय सुदूरपश्चिम प्रदेश सभामा सरकार टिकाइराख्न २७ सांसदको समर्थन आवश्यक पर्छ। हाल प्रदेश सभामा ५१ प्रदेश सभा सदस्य छन्। हाल सत्ता पक्षसँग कांग्रेसका १८ र एमालेका ११ गरी २९ सांसद छन्। तर, कांग्रेस सांसद प्रकाश देउवा हाल अमेरिकामा रहेको र एमालेले बजेटको विपक्षमा उभिने चेतावनी दिएका कारण सरकारलाई बजेट पारित गर्न आवश्यक बहुमत जुटाउन सकस देखिएको छ।
सत्ता पक्षकै दलहरूले विरोध गरिरहेको अवस्थामा यो बजेट पारित हुने सम्भावना नरहेको प्रमुख प्रतिपक्षी दल नेकपा नेपाली कम्युनिस्ट पार्टीको दाबी छ।
