धनगढी । रसुवा जिल्लामा आएको बाढीका कारण प्रभावित क्षेत्रमा काम गर्न गएका तथा हालसम्म परिवार र आफन्तको सम्पर्कमा नआएका व्यक्तिका परिवारसँग सम्पर्क तथा समन्वय गर्न मुक्त कमैया समाजले अपिल गरेको छ।
मुक्त कमैया समाजले प्रेस विज्ञप्ति जारी गर्दै रसुवामा आएको बाढीबाट भएको जनधनको क्षतिप्रति गहिरो दुःख व्यक्त गर्दै बाढीमा परी ज्यान गुमाएका सम्पूर्ण मृतकप्रति श्रद्धाञ्जली तथा शोकसन्तप्त परिवारजनमा समवेदना व्यक्त गरेको छ। साथै बाढी प्रभावित नागरिकको शीघ्र उद्धार, राहत तथा पुनर्स्थापनाका लागि सम्बन्धित निकायलाई आवश्यक पहल गर्न आग्रह गरेको छ।
समाजका अनुसार दाङ, बाँके, बर्दिया, कैलाली र कञ्चनपुरका मुक्त कमैया परिवारबाट रसुवा जिल्लाको बाढी प्रभावित क्षेत्रमा काम गर्न गएका र हालसम्म परिवार तथा आफन्तको सम्पर्कमा नआएका व्यक्तिहरू भएमा सम्बन्धित जिल्ला प्रतिनिधिमार्फत आवश्यक सम्पर्क तथा समन्वय गर्न अनुरोध गरिएको छ।
सम्पर्कविहीन व्यक्तिहरूको अवस्था पहिचान, उद्धार तथा परिवारसँग समन्वयका लागि सम्बन्धित सरकारी निकाय, सुरक्षा निकाय तथा सरोकारवाला सबै पक्षलाई प्रभावकारी रूपमा परिचालन हुनसमेत समाजले आग्रह गरेको छ।
मुक्त कमैया समाजका केन्द्रीय अध्यक्ष पशुपति चौधरीद्वारा जारी विज्ञप्तिमा सम्पर्कविहीन व्यक्तिका परिवारलाई आवश्यक जानकारी तथा सहजीकरणका लागि सम्बन्धित जिल्लाका प्रतिनिधिहरूसँग सम्पर्क गर्न सकिने जनाइएको छ।