बैतडी- राज्यले चासो नदिएपछि स्थानीयले काठका फलेक राखेर सेती नदीमा अस्थायी पुल निर्माण गरेका छन् । बैतडीको सिगास गाउँपालिका–७, भौनेलीपातलदेखि डोटीको आदर्श गाउँपालिका–६, पाङबबिना जोड्ने पुल डेढ वर्षअघिको बाढीले भत्काएको थियो ।
२०७८ साल कात्तिकमा सेती नदीको बाढीले पुलसँगै स्थानीय १०३ घरपरिवारको जग्गासमेत बगाएको थियो । बाढीपीडितले अहिलेसम्म कुनै राहत पाउन सकेका छैनन् । स्थानीय पदम खडायतले पुलको अभावमा स्थानीयवासीको दैनिकी कष्टकर बनेपछि समुदायको अगुवाइमा अस्थायी काठेपुल बनाइएको बताए ।
स्थानीयले काठेपुल निर्माण गरे पनि जोखिम भने उत्तिकै बढेको छ । सेती नदीमा स्थानीयले गत वर्ष पनि काठेपुल निर्माण गरेका थिए । पुल तर्दा गत वर्ष डोटीको आदर्श गाउँपालिका–६, गिरीचौकाबाट बैतडीको सिगास गाउँपालिका–७, सङ्डा आउँदै गर्दा पुलबाट खसेर एक किशोरीको मृत्यु भएको थियो ।
स्थानीय प्रेमबहादुर बोहराले सेतीको बाढीले बैतडीको ढुङ्गाडलगायतका क्षेत्रका घरखेत र नदी तर्ने पुल बगाएपछि पुनर्निर्माणका लागि स्थानीयले आग्रह गर्दै आएका थिए । उनका अनुसार डोटीको आदर्श गाउँपालिकासम्म यातायात पुगेकाले दैनिक उपभोग्य वस्तु किन्न पनि काठेपुलमा जोखिम मोलेर जानुपर्ने बाध्यता छ । उनले भने, ‘सेती नदी तर्ने पुलसम्म छैन । जोखिम मोलेर नदी तर्दा मर्ने बाँच्ने ठेगान हुँदैन ।’
बाढीले पु¥याएको क्षतिको अवलोकन गर्न गत वर्ष प्रधानमन्त्री, मुख्यमन्त्री, गृहमन्त्री, सङ्घीय सांसद, स्थानीय तहका प्रमुखलगायतका नेता आए पनि हालसम्म राहत नपाएको स्थानीय लोकबहादुर चन्दले पीडा सुनाए । उनले भने, ‘बाढीले घरखेत बगायो । मोटर चल्ने बाटो छैन ।
नदी तर्न पुल छैन । निरीक्षण गर्न नेता आए पनि कुनै राहत आएन । बाढीले अन्न फल्ने खेतमा बालुवा थुप्रिएको छ ।’ स्थानीय लोकबहादुर चन्दले बैतडीको ढुङ्गाड क्षेत्रमा पटक–पटकको बाढीले गाउँ तहसनहस हुँदा पनि गतिलो तटबन्ध निर्माण हुन नसकेको बताए । गोरखापत्रबाट
