धनगढी। कैलालीको गोदावरी नदी किनारमा जुवातास खेलिरहेको स्थानबाट प्रहरीले सरकारी मोटरसाइकलसहित ११ वटा मोटरसाइकल नियन्त्रणमा लिएको छ । तर सरकारी नम्बर प्लेटको मोटरसाइकल जुवाको खालसम्म कसरी पुग्यो भन्ने विषय भने खुलेको छैन ।
जुवातास खेलिरहेको सूचना पाएपछि प्रहरीले गोदावरी नदी किनारमा छापा मारेको थियो । छापा मार्ने क्रममा विभिन्न व्यक्तिका मोटरसाइकलसँगै सरकारी नम्बर प्लेट भएको से १ ब ११८१ नम्बरको मोटरसाइकलसमेत फेला परेको हो ।
प्रहरीका अनुसार बरामद सरकारी मोटरसाइकल कुन सरकारी कार्यालयको हो भन्ने यकिन भइसकेको छैन । मोटरसाइकल कसको जिम्मामा थियो र सरकारी सवारीसाधन जुवाको खालमा कुन प्रयोजनका लागि लगिएको थियो भन्ने विषयमा अनुसन्धान भइरहेको छ ।
जुवाको खालबाट सरकारी मोटरसाइकल भेटिएपछि प्रहरीले सवारीसाधनको प्रयोग र त्यसमा संलग्न व्यक्तिबारे समेत अनुसन्धान अघि बढाएको जनाएको छ ।
घटनास्थलबाट नियन्त्रणमा लिइएका ११ वटै मोटरसाइकल र संलग्न व्यक्तिहरूबारे अनुसन्धान भइरहेको प्रहरीले जनाएको छ । अनुसन्धानबाट सरकारी मोटरसाइकलको स्वामित्व, प्रयोगकर्ता र जुवाको खालसम्म पुगेको कारण खुल्ने प्रहरीले जनाएको छ ।
