धनगढी । गत वर्ष भदौमा भएको जेनजी आन्दोलनका बेला सुदूरपश्चिमका विभिन्न कारागारबाट भागेका तीन सयभन्दा बढी कैदीबन्दी अझै फरार छन् । सुदूरपश्चिम प्रदेश प्रहरी कार्यालयका अनुसार यहाँका जिल्ला कारागारहरुबाट भागेका एक हजार ४५८ कैदीबन्दीमध्ये तीन सय १८ जना अहिले पनि फरार छन् ।
भागेका कतिपय कैदीबन्दीको आपराधिक गतिविधिमा संलग्नता देखिने गरेको छ । सुदूरपश्चिमका कारागारबाट भागेका एक हजार १४० जना कैदीबन्दी भने कारागार फर्किएका प्रदेश प्रहरी कार्यालयका प्रवक्ता प्रहरी बरिष्ठ उपरीक्षक पदम बिष्टले बताए । भागेका केही कैदीबन्दीलाई प्रहरीले पक्राउ गरेको हो भने केही आफै कारागार फर्किएका हुन् । फरार कैदीबन्दीमा विदेशीसमेत नागरिक पनि छन् ।
सबैभन्दा बढी कैलाली कारागारका दुई सय दुई जना कैदीबन्दी फरार छन् । जेन जी आन्दोलनको दिन गत वर्ष २४ भदौमा कैलाली कारागारबाट छ सय ६५ जना कैदीबन्दी भागेका थिए । आन्दोलनका क्रममा आन्दोलनकारी प्रवेश गरेर सुरक्षा व्यवस्था प्रहरीको नियन्त्रण बाहिर गएपछि कैदीबन्दी भागेका हुन् । फरार रहेकामध्ये १९ जना भारतीय नागरिक रहेका कैलाली कारागारका नासु बसन्त जोशीले बताए । उनीहरु लागुऔषलगायत विभिन्न मुद्दामा कारागारमा थिए ।
११ जना महिला पनि फरार रहेका जोशीले जानकारी दिए । आन्दोलनको दिन कैलाली कारागारमा दुई सय ६६ जना रहेकोमा एकजनामात्र भागेका थिएनन् । भागेकामध्ये केही आफै फर्किएका र केहीलाई प्रहरीले पक्राउ गरेर बुझाएको कारागार प्रशासनले जनाएको छ । कारागार फर्किएका केही कैदी भुक्तान गरेर छुटिसकेका पनि छन् । आन्दोलनका क्रममा कारागारमा तोडफोडसमेत भएको थियो ।
कञ्चनपुर कारागारबाट भागेका ८६ जना कैदीबन्दी अझै फरार छन् । कारागार प्रशासनका अनुसार जेनजी आन्दोलनको बेला कारागारमा रहेका चार सय ७८ कैदीबन्दी रहेकोमा १७ जनाबाहेक सबै भागेका थिए । बाँकी फरार कैदीबन्दी सुदूरपश्चिमका पहाडी जिल्लामा रहेका कारागारका हुन् । भागेका कैदीबन्दीलाई फर्कन सम्बन्धित जिल्ला प्रशासन कार्यालयहरुले सूचना जारी गर्दै आएका छन् ।
विभिन्न आपराधिक गतिविधिमा संलग्न ठूलो संख्याका कैदीबन्दी कारागार बाहिर हुँदा त्यसले सुरक्षा चुनौति बढाएको सुरक्षा अधिकारीहरु बताउँछन् । फरारमध्ये धेरैजसो लामो अवधि कैद भुक्तान गर्न बाँकी रहेका र जघन्य अपराधमा संलग्नहरु रहेका बताइएको छ । भागेका धेरैजसो कैदीबन्दीहरु खुला सीमानाका कारण भारत गएको हुनसक्ने अनुमान छ ।
प्रदेश प्रहरी कार्यालयका प्रवक्ता बिष्टले फरार कैदीबन्दीलाई नियन्त्रणमा लिन सुरक्षा निकायले सीमा नाकाहरुमा निरन्तर निगरानी गर्दै आएको बताए । त्यस्तै साझा पोशाकमा प्रहरी परिचालन गरेर फरार व्यक्तिको सूचना संकलन गर्ने गरिएको उनले बताए ।
‘सीमा क्षेत्रमा बोर्डर क्राइम कन्ट्रोल टीमले निगरानी गर्दै आएको छ । फरार कैदीबन्दीको विवरण सबै प्रहरी युनिटहरुमा पठाएका छौँ । पक्राउ गर्न सादा पोशाकमा प्रहरी परिचालन गर्ने, सूचना संकलन गर्ने काम पनि भइरहेको छ’ बिष्टले भने, ‘धेरैजसो कैदीबन्दीलाई पक्राउ गरेर कारागार बुझाएका छौँ ।’
जेनजी आन्दोलनमा ठूलो संख्यामा कैदीबन्दी भागेकाले गत फागुनको चुनावमा फरार कैदीबन्दीलाई प्रमुख सुरक्षा चुनौतिका रुपमा हेरिएको थियो । चुनाव भने यहाँ शान्तिपूर्ण रह्यो ।