धनगढी । मदिरा सेवनबाट बढ्दै गएको घरेलु हिंसा, स्वास्थ्य तथा सामाजिक समस्याको न्यूनीकरणका लागि सञ्चार क्षेत्रले प्रभावकारी भूमिका निर्वाह गर्नुपर्नेमा धनगढीमा आयोजित एक कार्यक्रममा जोड दिइएको छ।
आज धनगढीमा सिविन नेपालले आयोजना गरेको कार्यक्रममा मदिरा नियन्त्रण र नियन्त्रणमा सञ्चार क्षेत्रको भूमिका विषयमा छलफल गरिएको हो। कार्यक्रममा मदिरा सेवनबाट हुने सामाजिक, आर्थिक तथा स्वास्थ्यसम्बन्धी असरबारे समाचार तथा जनचेतनामूलक सामग्रीमार्फत नागरिकलाई सचेत गराउँदै राज्यलाई प्रभावकारी कदम चाल्न दबाब सिर्जना गर्नुपर्ने विषयमा छलफल भएको थियो।
नेपाल सरकारले मदिरा नियन्त्रण तथा नियमनसम्बन्धी विभिन्न कानुनी व्यवस्था गरे पनि त्यसको प्रभावकारी कार्यान्वयन हुन नसकेको सहभागीहरूले बताएका छन्। कानुनको कार्यान्वयनसँगै मदिराको उत्पादन, बिक्री–वितरण तथा सेवनलाई व्यवस्थित र नियन्त्रण गर्न राज्यका निकाय थप जिम्मेवार बन्नुपर्नेमा उनीहरूले जोड दिएका छन्।
सिविन नेपालका परियोजना प्रबन्धक सागर भण्डारीका अनुसार कार्यक्रममा मदिरा सेवनका कारण परिवार तथा समुदायमा देखिएका समस्याका साथै नियन्त्रणका लागि सञ्चार माध्यमले खेल्न सक्ने भूमिकाबारे छलफल गरिएको हो।
मदिरा सेवनका कारण घरेलु हिंसा, पारिवारिक आर्थिक समस्या, स्वास्थ्यमा असर तथा सामाजिक विकृति बढिरहेको भन्दै यसको नियन्त्रणका लागि सरकार, स्थानीय तह, सञ्चार क्षेत्र, नागरिक समाज तथा समुदाय सबैको सहकार्य आवश्यक रहेको सहभागीहरूले बताएका छन्।
कार्यक्रममा  मदिरा सेवनका कारण हुने स्वास्थ्य तथा सामाजिक असर, बालबालिकामा पर्ने प्रभाव र जोखिममा रहेका परिवार तथा समुदायका विषयमा समेत चर्चा गरिएको सिविन नेपालका परियोजना  प्रबन्धक भगवती श्रेष्ठले निशाना न्युजलाई जानकारी दिइन्।