धनगढी । सुदूरपश्चिममा ९ वर्षको अवधिमा एक हजार चार सय ४८ वटा खानेपानी योजनाहरु सम्पन्न भएका छन् । आर्थिक वर्ष २०७४/७५ देखि आव २०८२/८३ सम्मको अवधिमा प्रदेशका नौ जिल्लामा उक्त खानेपानी योजनाहरु सम्पन्न भएको हुन् ।
भौतिक पूर्वाधार विकास मन्त्रालयले सार्वजनिक गरेको मन्त्रलायद्वारा सम्पादित कार्यक्रम तथा गतिविधिको स्थिति पत्रमा सो अवधिमा तीन हजार एक सय २८ वटा इन्टेक र तीन हजार दुई सय ३२ वटा पानी पोखरीहरूको निर्माण सम्पन्न भएका छ ।
त्यस्तै,खानेपानी वितरणका लागि १२ हजार चार सय ९२ किलोमिटर पाइपलाइन जडान गरिएको छ । उक्त खानेपानी योजनाहरुबाट पाँच लाख ७१ हजार ८५ जनसंख्या प्रत्यक्ष लाभान्वित भएका भौतिक पूर्वाधार विकासमन्त्री ओमविक्रम भाट ‘सरल’ले जानकारी दिए ।
सो अवधिमा सञ्चालित करिब एक हजार एक सय ५० वटा खानेपानी आयोजनाहरुमा प्रदेश सरकारले लगानी गरी अधुरो अवस्थामा रहेका उनले जानकारी दिए ।
त्यस्तै,प्रदेशमा सञ्चालित एक सय ९३ वटा बहुवर्षीय आयोजनाहमध्ये एक सय २९ आयोजनाको भौतिक प्रगति ५० प्रतिशतभन्दा कम रहेको स्थिति पत्रमा उल्लेख छ । ५० देखि ६० प्रतिशत भौतिक प्रगति भएका आयोजना १९ वटा,६० देखि ८० प्रतिशत भौतिक प्रगति भएका आयोजना २२ वटा र ८० प्रतिशतभन्दा माथि भौतिक प्रगति भएका आयोजना २३ वटा रहेका मन्त्रालयले जनाएको छ ।
त्यस्तै,मन्त्रालय अन्तरगतका ३१ वटा बहुबर्षीय आयोजनाहरु निर्माण व्यवसायी र ढिलासुस्तीका कारण रुग्ण अवस्थामा पुगेका स्थिति पत्रमा उल्लेख छ ।
