धनगढी– कैलालीको चुरे गाउँपालिका–४ बाटेगढामा पहिलोपटक बिजुली बत्ति पुगेको छ। विद्युत् नहुँदा सोलारबाट नै घर उज्यालो पार्दै आएका बाटेगढाका स्थानीयले पहिलोपटक बिजुली बत्ति बाल्न पाएका छन्। शनिबार गाउँपालिका अध्यक्ष चक्र बोगटीले विद्युत् उद्घाटन गरेका छन्।
अध्यक्ष बोगटीले हरेक टोल र बस्तीमा विद्युत्को पहुँच पुर्याउने लक्ष्यका साथ काम गरिराखेको बताए। हरेक बस्तीलाई उज्यालो बनाउने अभियानमा लागिपरेको उनको भनाइ छ।
विद्युत् प्राधिकरण धनगढी वितरण शाखाका प्रमुख सूर्य नारायण मण्डललले दुई वर्षभित्र कैलालीका सबै बस्तीमा विद्युतिकरण गर्ने लक्ष्य रहेको जानकारी दिए। उनले शनिबार विस्तारित विद्युतिकरण अन्तर्गत १२ औं ट्राँस्फर्मर रहेको बताए। २०७६ सालदेखि यो बस्तीमा विद्युत् पुर्याउने प्रयास सुरु भएको थियो।
एक करोड ५६ लाखको लागतमा ओम बीरभद्र कन्स्ट्रक्सन र अमित कन्स्ट्रस्कनले सो वडाभरी विद्युतिकरण गर्ने ठेक्का पाएको छ। २०७६ सालमा बालुवागडामा विद्युतिकरण विस्तार भएको थियो भने शनिबार बाटेगढामा विद्युतिकरण विस्तार भएको छ। यस्तै गाउँपालिकाले जागती, गर्भा दरबारमा विद्युत् विस्तार गर्ने तयारी भइरहेको छ।
स्थानीय खडक तारामी मगरले विद्युत् विस्तार भएसँगै सहज भएको बताए। उनले भने, ‘विद्युत् विस्तार भएपछि यहाँका विद्यार्थीलाई अध्ययनमा सहज हुने भएको छ।’
सोलारबाट घर उज्यालो पार्दै आएकोमा अब बिजुली बत्ति बाल्न पाएको भन्दै स्थानीय निशा रानामगरले खुसी व्यक्त गरिन्। पानी पर्दा र बादल लाग्दा सोलारले काम नगर्ने र अँध्यारोमा बस्नुपर्ने बाध्यताबाट अब मुक्त भएको उनी बताउँछिन्।
