कैलाली- डिल्लीबजार कारागारमा रहेका नागरिक उन्मुक्ति पार्टीका संरक्षक रेशम चौधरीलाई रिहा गर्न आफूले पहल गर्ने सुदूरपश्चिम प्रदेशका मुख्यमन्त्री कमल शाहले प्रतिबद्धता जनाएका छन् ।
कैलालीको जानकी गाउँपालिका ६ स्थित जगतपुर पुगेर मुख्यमन्त्री शाहले रेशम चौधरीलाई रिहा गर्न पहल गर्ने बताएका हुन् । रेशमको घर पुगेर आमा सुल्फी देवी चौधरीलाई भेट्दै मुख्यमन्त्री शाहले यस्तो प्रतिबद्धता जनाएका हुन् ।
टीकापुरको घटनाले सामाजिक सद्भावमा ठेस पुगेको उनको भनाई थियो। ‘टीकापुरको घटनाले सामाजिक सद्भावमा ठेस पुर्याएको छ । हामी त्यसलाई पुरानै स्थितिमा ल्याउने प्रयास गरिरहेका छौँ’ मुख्यमन्त्री शाहले भने ‘केन्द्र सरकारले रेशम चौधरीलाई छिटो रिहा गर्नुपर्छ । म त्यसको लागि लागिपरेको छु ।’
पुस २७ गते मुख्यमन्त्रीमा नियुक्त भएका एमाले संसदीय दलका नेता राजेन्द्रसिंह रावलले विश्वासको मत नपाएपछि राजीनामा दिएका थिए । रावलले राजीनामा दिएपछि कांग्रेस संसदीय दलका नेता शाह मुख्यमन्त्रीमा नियुक्त भएका थिए । शाहले पनि ३० दिन भित्र विश्वासको मत लिनु पर्ने छ । उनले आज आफूले ३० दिन भित्र विश्वासको मत पाउने दाबी समेत गरेका छन् ।
