धनगढी- सुदूरपश्चिम प्रदेशका मुख्यमन्त्री कमलबहादुर शाहले पदभार ग्रहण गरेको एक घण्टा नबित्दै नागरिक उन्मुक्ति पार्टी (नाउपा) का अध्यक्ष रञ्जिता श्रेष्ठ एवम् कैलाली क्षेत्र नं–१ की प्रतिनिधि सभा सदस्यलाई भेटेका छन् । सुदूरपश्चिम प्रदेशको निर्णायक शक्ति नाउपाका अध्यक्ष श्रेष्ठलाई मुख्यमन्त्री शाहले टीकापुरमै पुगेर भेटेका हुन् । टीकापुर अध्यक्ष श्रेष्ठको गृहनगर हो । टीकापुरस्थित एक होटल दुई नेताबीच भेटवार्ता भएको हो । मुख्यमन्त्री शाहले अध्यक्ष श्रेष्ठसङ्ग समान्य भेटघाट मात्र भएको बताए ।

श्रोतका अनुसार उनीहरूबीचको भेटवार्ता टीकापुर घटानामा बन्दी जीवन बिताइरहेका नाउपाका संरक्षकसमेत रहेका रेशम चौधरीलगायतको रिहाइ र प्रदेश सरकारलाई विश्वासको मत दिने सन्दर्भमा केन्द्रित रहेको बताइएको छ । उक्त भेटका क्रममा नागरिक उन्मुक्ति पार्टीका सुदूरपश्चिम प्रदेश सभाका प्रमुख सचेत लक्ष्मणकिशोर चौधरी समेत सहभागी थिए ।

रेशमकी आमाबाट आशिर्वाद थापे
मुख्यमन्त्री शाहले रेशम चौधरीको घरको घर जानकी गाउँपालिका वडा नं–६ जगतपुर पुगेर उनकी आमा सुल्फीदेवीलाई पनि भेटेका छन् । भेटका क्रममा मुख्यमन्त्री शाहले बन्दी जीवन बिताइरहेका रेशमसहितका बन्दीको रिहाइका लागि सक्दो पहल गर्ने प्रतिवद्धता जनाएका छन् ।

मुख्यमन्त्री शाहलाई भेटेपछि सुल्फीदेवीले खुशी व्यक्त गरेकी छन् । उनले आफूले सानैमा खेलाएको व्यक्ति मुख्यमन्त्री भएर आफ्नै घर आँगनमा आएको भन्दै गौरवान्वित भएको बताइन् । साथै उनले छोरोको रिहाइका लागि आवश्यक पहल गरिदिन आग्रहसमेत गरिन् । मुख्यमन्त्री शाहले आमालाई भेटेर आशिर्वाद लिएको बताए ।