धनगढी- राष्ट्रिय जनगणना २०७८ को तथ्यांक अनुसार सुदूरपश्चिका पाँच पहाडी जिल्लाको जनसंख्या घटेको छ । तीब्र बसाइसराईका कारण पहाडी जिल्लाको जनसंख्या घटेर तराईका जिल्लामा थपिएकोे छ ।

सार्वजनिक तथ्यांक अनुसार पहाडी जिल्लाका अछाम, डोटी, डडेल्धुरा, बझाङ र बैतडी जिल्लामा पछिल्लो एक दशमा जनसंख्या घटेको हो । सबैभन्दा बढी अछाममा १ दशमलव १३ प्रतिशतले जनसंख्या घटेको छ । अछाममा २०६८ सालको जनगणनाअनुसार दुई लाख ५७ हजार ४७७ जनसंख्या रहेकोमा दश वर्षको अवधिमा अर्थात् २०७८ सालसम्म २८ हजार छ सय २५ ले कमी आएर दुई लाख २८ हजार आठ सय ५२ मा झरेको छ ।

त्यस्तै, बझाङमा शून्य दशमलव ३ प्रतिशतले ऋणात्मक रहेको छ भने डोटीमा शून्य दशमलव ३२, बैतडीमा शून्य दशमलव ३४ र डडेल्धुरामा शून्य दशमलव १७ प्रतिशत जनसंख्या वृद्धिदर ऋणात्मक रहेको छ ।

२०६८ सालको राष्ट्रिय जनगणनामा देशभरि २७ वटा जिल्लामा जनसंख्या को वार्षिक वृद्धिदर ऋणात्मक रहेको थियो भने २०७८ सालको जनगणनामा यो संख्या ३४ पुगेको छ ।

प्रदेशको बझाङ जिल्लामा २०६८ सालको जनगणनाअनुसार एक लाख ९५ हजार एक सय ५९ जनसंख्या रहेको थियो भने २०७८ सालको जनगणना नतिजामा जनसंख्या वृद्धिदर घटेर एक लाख ८९ हजार ८५ मा झरेको छ ।

त्यस्तै, डोटीमा २०६८ सालमा दुई लाख ११ हजार सात सय ४६ जनसंख्या रहेकोमा २०७८ सालसम्म आइपुग्दा दुई लाख चार हजार आठ सय ३१ मा झरेको छ ।

बैतडीमा २०६८ सालको जनगणनाअनुसार दुई लाख ५० हजार आठ सय ९८ जनसंख्या रहेको थियो । २०७८ सालको जनगणना नतिजाअनुसार बैतडीमा जनसंख्या वृद्धिदरमा कमी आएर दुई लाख ४२ हजार एक सय ५७ मा झरेको छ ।

डडेल्धुरामा पनि दश वर्षको अवधिमा दुई हजार चार सय ९२ जनसंख्या घटेको जनगणनाको नतिजाले देखाएको छ । डडेल्धुरामा २०६८ सालमा एक लाख ४२ हजार ९४ जनसंख्या रहेकोमा २०७८ मा घटेर एक लाख ३९ हजार छ सय दुईमा झरेको छ ।

सुदूरपश्चिम प्रदेशका प्रायः पहाडी जिल्लाहरूबाट तराईका दुई जिल्ला कैलाली र कञ्चनपुरमा बसाईसराइको तीव्र चाप रहेको राष्ट्रिय जनगणना, २०७८ को नतिजाले पनि पुष्टि गरेको छ ।

कैलालीमा वार्षिक जनसंख्या वृद्धिदर एक दशमलव ४८ पुगेको छ । यससँगै कैलालीको जनसंख्या नौ लाख चार हजार छ सय ६६ पुगेको छ ।

त्यस्तै, कञ्चनपुरको वार्षिक जनसंख्या वृद्धिदर एक दशमलव २५ रहेको छ । यससँगै कञ्चनपुरको जनसंख्या कञ्चनपुरको जनसंख्या पाँच लाख १३ हजार सात सय ५७ पुगेको छ ।

प्रदेशको हिमाली जिल्ला भए पनि बाजुरा र दार्चुलामा भने जनसंख्या वृद्धिदर घनात्मक रहेको जनगणनाको नतिजाले देखाएको छ । बाजुरामा वार्षिक जनसंख्या वृद्धिदर शून्य दशमलव २५ तथा दार्चुलामा शून्य घनात्मक रहेको छ ।

बाजुराको जनसंख्या एक लाख ३८ हजार पाँच सय २३ र दार्चुलाको जनसंख्या एक लाख ३३ हजार तीन सय १० पुगेको छ । समग्रमा सुदूरपश्चिम प्रदेशको जनसंख्या २०६८ सालदेखि २०७८ सालसम्मको अवधिमा पाँच दशमलव ५७ प्रतिशतले वृद्धि भएको छ ।