बझाङ- छात्राहरुमा टाउको दुख्ने, खुट्टा झमझम हुने, रुने, कराउने र बेहोस हुने समस्या देखिएपछि प्रभावित भएको साइपालको धलौन माध्यमिक विद्यालयमा मनोचिकित्सकको टोली पुगेको छ । असारको तेस्रो सातादेखि प्रभावित विद्यालयका विद्यार्थी, शिक्षक, अभिभावक, जनप्रतिनिधिहरु र सुरक्षाकर्मीसँग टोलीले समस्याको बारे मनोपरामर्श सेवा दिएको छ ।
यो समस्याका कारण धलौन माविको पढाइ र स्थानीयको समेत दिनचर्या बिथोलिएको बारे कान्तिपुरमा समाचार प्रकाशित भएपछि विश्व स्वास्थ्य संगठन, मानसिक तथा नसा रोग नियन्त्रण महाशाखा, र मानसिक स्वास्थ्य तथा परामर्श केन्द्रका पाँचजना स्वास्थ्यकर्मीहरु साइपाल पुगेका हुन् । गत मंगलबार साइपाल पुगेको टोलीले चार दिनसम्म विभिन्न विधिबाट परामर्श गरेपछि अहिले समस्यामा कमी आएको विद्यालयले जनाएको छ ।
‘उहाँहरु आएको दिन २२ जनालाई समस्या भएको थियो । त्यसको भोलिपल्ट पाँच जनालाई भयो । शुक्रबारदेखि कोही पनि बिरामी भएका छैनन्,’ धलौन माविका सहायक प्रधानाध्यापक झलक धामीले भने ‘अब निको हुन्छ की भन्ने आस लागेको छ ।’
मानसिक रोग विषेशज्ञ डा. निराजन भट्टराईको नेतृत्वमा गएको टोलीमा मनोविद एवन श्रेष्ठ, मनोपरामर्शकर्ता शान्त खड्का र कल्पना बडु तथा विद्यालय नर्स पवित्रा उपाध्याय धलौन पुगेका हुन् । उनीहरुले समस्यामा परेका प्रत्येक विद्यार्थीलाई मनोपरामर्श दिएका छन् ।
‘चिकित्सकहरुले योग गर्ने, मन बलियो बनाउने, विद्यालयमा रमाइलो वातावरण बनाउने जस्ता कुराहरु सिकाएपछि अहिले बेहोस हुन बन्द भएको छ,’ साइपाल गाउॅपालिकाका प्रवक्ता नरेन्द्र धामीले भने ‘यस्तो समस्या दोहोरिएमा के गर्न भनेर हामीलाई पनि सल्लाह दिनु भएको छ ।’
यो समस्या मास कन्भर्जन डिस्अर्डर भएकोले आतिनुपर्ने अवस्था नरहेको टोलीका प्रमुख डा. निराजन भट्टराईले बताए । ‘यो सामान्य तनाव र डरको कारणले हुने समस्या हो । यसबाट ज्यान जोखिममा पर्ने शरीरलाई अन्य हानि हुने केही हुँदैन,’ उनले भने ‘यो समस्या हुँदा के गर्ने र कसरी व्यवस्थापन गर्ने भनेर सबै पक्षलाई सम्झाएर आएका छौं । आशा गरौं अब दोहोरिन्न होला ।’
असार तेस्रो साताबाट सुरु भएको यो समस्याका कारण धलौन माविमा नियमित पठनपाठन प्रभावित छ । यो समस्या समाधान गर्न स्थानीयले पूजा भाकल गर्ने गरेका थिए । स्थानीय स्वास्थ्यकर्मीले समाधान गर्न नसके साइपाल गाउँपालिकाले यो समस्या समाधान गर्न सरकारसँगै विश्व स्वास्थ्य संगठनलाई पत्राचार गरेको थियो । कान्तिपुरबाट
