दार्चुला- हिमाली क्षेत्र व्यास गाउँपालिकाको सुन्सेरा क्षेत्रमा डेंगी सार्ने लामखुट्टे भेटिएको छ । मध्य साउनमा सुदूरपश्चिम स्वास्थ्य निर्देशनालयको किटजन्य रोग नियन्त्रणबाट गरिएको अनुसन्धानबाट संक्रामक लामखुट्टे भेटिएको हो ।
सुदूरपश्चिम स्वास्थ्य निर्देशनालयका किटजन्य रोग नियन्त्रण सम्पर्क व्यक्ति हेमराज जोशीको टोली सुन्सेरामै पुगेर अनुसन्धान गर्दा डेंगी सार्ने लामखुट्टे भेटिएको स्वास्थ्य कार्यालयका खोप सुपरभाइजर वीरेन्द्र भट्टले बताए । जोशीको टोली गत साउन १५ र १६ गते सुन्सेरा क्षेत्रमा पुगेको थियो । फेला परेको लामखुट्टेको नुमना अहिले महेन्द्रनगरको इन्टोमलोजी ल्याबमा परीक्षण भइरहेको भट्टले बताए ।
हिमाली जिल्ला दार्चुलामा डेंगी संक्रमण तीव्र भएपछि प्रदेशको स्वास्थ्य निर्देशनालय अन्तर्गतको किटजन्य रोग नियन्त्रण केन्द्रले खोज अनुसन्धान गरिरहेको छ । त्यसक्रममा जिल्लाकै उच्च हिमाली गाउँपालिका व्यासमा पनि डेंगी सार्ने लामखुट्टे भेटिएपछि त्यसको नमुना संकलन गरेर अनुसन्धान भइरहेको भट्टले बताए । मध्य साउनमा सुन्सेरामै बसेर टोलीले नुमना संकलन गरेको हो ।
प्रदेशमै सबैभन्दा बढी डेंगी संक्रमित देखिएपछि हिमाली गाउॅपालिका व्यासमा संक्रामक लामखुट्टेको पुगे नपुगेको अध्ययन गर्न टोली दार्चुला पुगेको थियो । गत चैतमा पनि किटजन्य रोग नियन्त्रण केन्द्रको टोली यहाँ आएको उनले जानकारी दिए ।
खोप सुपरभाइजर भट्टका अनुसार परीक्षणमा राखिएको लामखुट्टेको रिपोर्ट एकरदुई दिनभित्र आउन सक्छ । तराईका जिल्लामा बढी हुने डेंगी संक्रमण पछिल्लो समय पहाड र हिमाली क्षेत्रमा पनि देखिन थाल्दा नियन्त्रणमा चिन्ता बढेको छ । जिल्लाकै हिमाली गाउँपालिका व्यासमा मात्रै २० जनामा डेंगी संक्रमण देखिएको उनले बताए ।
संक्रमण बढ्दै जाँदा बिरामीलाई अस्पताल भर्ना गरेर उपचार गर्नुपर्ने अवस्था आएको स्वास्थ्य कार्यालय दार्चुलाले जनाएको छ । जिल्लामा गत पुसयता हालसम्म एक सय ९० जनामा डेंगी संक्रमण देखिएको छ ।
