धनगढी- धनगढीस्थित स्वस्तिक कार्डियो एण्ड मल्टिस्पेसियालिटी हस्पिटल अवैधानिक रहेको खुलेको छ । अस्पतालले हालसम्म सञ्चालनको अनुमति नलिएको पाइएको हो ।
१ देखि १५ शय्यासम्मको अस्पतालले स्थानीय पालिकाबाट र १५ देखि माथि शय्याको अस्पताल सञ्चालनको लागि प्रदेश सरकार मातहतको स्वास्थ्य निर्देशनालयबाट सञ्चालन अनुमति लिनुपर्ने प्रावधान रहेको छ ।
तर सो अस्पतालले निर्देशनालयबाट हालसम्म अनुमति नलिएको पाइएको हो । सुदूरपश्चिम स्वास्थ्य निर्देशनालय डोटीका निर्देशक डाक्टर जगदीश जोशीका अनुसार सो अस्पतालले २५ शय्याको लागि प्रक्रिया अगाडि बढाएको छ ।
निर्देशक जोशीले भने, ‘अस्पताल दर्ता प्रक्रियाका लागि फाइल आएको छ । तर केही कागजात अपुग देखिएपछि सञ्चालन अनुमति दिएका छैनौँ ।’ अस्पतालका अध्यक्ष महेश जोशीले भने दर्ता रहेको दाबी गरेका छन् । अस्पतालले ०७९ माघ देखि नै सेवा सुरु गरेको हो ।
