धनगढी- यौन दुर्व्यवहार गरेको आरोपमा पक्राउ परेका शिक्षकमाथि कुटपिट भएको विषयलाई लिएर कञ्चनपुरमा भएका आन्दोलनका कार्यक्रम फिर्ता लिइएको छ। नेपाल शिक्षक महासंघ कञ्चनपुरले बन्द रहेका विद्यालय बुधबारदेखि खुलाउने गरी आन्दोलनका कार्यक्रम मंगलबार फिर्ता लिएको हो।

गत भदौ ३ गते भीमदत्त नगरपालिका-१० को शिद्धनाथ माध्यामिक विद्यालयका शिक्षक वीरेन्द्रप्रसाद जोशीमाथि कुटपिट भएको थियो।उनीमाथि सोही विद्यालयमा कक्षा १० मा पढ्ने एक छात्रामाथि यौन दुर्व्यवहार गरेको आरोप लागेको थियो।

आरोपपछि प्रहरीले पक्राउ गरेर लैजाने क्रममा आक्रोशित भीडले शिक्षक जोशीमाथि कृटपिट गरेको थियो। ज्यान लिने गरेर शिक्षकमाथि कुटपिट भएको भन्दै नेपाल शिक्षक महासंघ कञ्चनपुरले आपत्ति जनाएको थियो।

विद्यालय हाताभित्र पसेर लेखापाल जोशीमाथि निर्घात कुपिट गर्ने समूह र घटनास्थलमा खटिएका प्रहरीलाई कारबाहीको माग गर्दै सोमबारदेखि जिल्लाव्यापी शिक्षण संस्था बन्द गरिएको थियो।

उनीहरूको मागअनुसार जिल्ला प्रशासन कार्यालयले प्रहरी अधिकृतमाथि छानबिन गर्न सहायक प्रमुख जिल्ला अधिकारी धर्मराज जोशी संयोजक रहेको चार सदस्यीय छानबिन समिति गठन गरेको छ।

समितिमा नेपाल प्रहरी र सशस्त्र प्रहरीका डिएसपी तथा राष्ट्रिय अनुसन्धान विभागका अतिरिक्त अनुसन्धान निर्देशक रहेका छन्। यो समितिले सुरक्षा निगरानीमा रहेका शिक्षकमाथि कसरी कुटपिट भयो भन्ने विषयमा अनुसन्धान र छानबिन गर्ने प्रमुख जिल्ला अधिकारी गोपालकुमार अधिकारीले जानकारी दिए।

‘प्रहरीको नियन्त्रणमा आइसकेपछि पनि के कारणले उनीमाथि कुटपिट भयो, सुरक्षा व्यवस्थामाथि कमीकमजोरी भयो भन्ने प्रश्न पनि आए, र भविष्यमा यस्ता घटना दोहोरिन नदिन समिति गठन गरेर छानबिन हुनेछ,’ उनले भने।

शिक्षकमाथि कुटपिट गरेको भन्दै केही व्यक्तिको नाममा किटानी जाहेरी दिइएको थियो। जाहेरीअनुसार प्रहरीले ९ जनालाई पक्राउ गरेको छ।दुई जना फरार छन्। उनीहरूको खोजी भइरहेको प्रहरीले जनाएको छ।

यौन दुर्व्यवहारको आरोप लागेका शिक्षक जोशी अहिले प्रहरीको निगरानीमा धनगढीको निसर्ग अस्पतालमा उपचाररत् छन्। जिल्ला प्रहरी कार्यालय कञ्चनपुरका डिएसपी प्रकाश डाँगीका अनुसार उनीमाथि यौन दुर्व्यवहार गर्न नहुने मुद्दा दर्ता भएर थप कारबाहीका लागि पक्रिया अघि बढेको छ।