बझाङ- सेती लोकमार्ग अन्तर्गत जिल्लाको खप्तडछान्ना गाउँपालिकामा निर्माणाधिन तीन वटा पक्की पुलको निर्माण कार्य अलपत्र परेको छ । ठेकेदार कम्पनीहरुको चरम लापरबाहीका कारण सम्झौता भएको पाँच वर्ष बितिसक्दा पनि निर्माण हुन सकेको छैन ।

सेती लोकमार्ग दक्षिणी खण्डले २०७५ सालमा बोलपत्र आह्वान गरि निर्माण कार्य सुरु गरेको थियो । सम्झौता गरि काम सुरुवात गर्न ठेकेदार कम्पनीले ढिला सुस्ती भएका कारण तीन वटै पुलको निर्माण कार्य रोकिएको थियो ।

खप्तडछान्ना गाउँपालिका-१ को जाडारमा ६ करोड ५० हजारको लागतमा खाम्पा टिडिआर जेभि, खप्तडछान्ना गाउँपालिका-२ कुचेखोला (कालिपछाई) रायमाझी केराभान जेभीले ५ करोड र खप्तडछान्ना गाउँपालिका-७ बिडिगाडमा अम्भर कन्स्ट्रक्सनले ५ करोडको लागतमा सम्झौता गरेको थियो ।

स्थानीय सरकार र स्थानीयबासीले पटकपटक निर्माण छिटो गर्नका लागी ताकेता गरेको भएपनि ठेकेदार कम्पनीले कुनै वास्ता गरेको छैन । पुल समयमै सम्पन्न हुन नसक्दा स्थानीयले अनावश्यक दुख खेप्नुपरेको छ भने दैनिक उपभोग्य बस्तुहरुको आयतमा समेत समस्या भएपछि महङ्गो मुल्य तिर्नुपर्ने बाध्यता छ ।

खप्तडछान्ना गाउँपालिकाका उपाध्यक्ष विष्णु कुमार थापाले भने, “सुरुमा ठेकेदार कम्पनीले ढिला सुस्ती गरेको थियो । गाउँपालिकाबाट समेत पटकपटक ताकेता गरेपछि सेतीलोक मार्गको अफिसबाट समेत ठेकेदारलाई दवाव गरेपछि गएको वर्ष काम गरेको र वर्षायाम सुरु भएकाले बन्द भएको हो । वर्षा सकिएपछि काम गर्ने ठेकेदार कम्पनीसँग कुरा भएको छ” ।

उनले आउँदो असारसम्म जडारी गाड र कुचे खोलाको पक्की पुलको निर्माण कार्य सम्पन्न हुने सक्ने र विडिगाडको पुलमा कार्यालय र ठेकेदार बिच पुलको गुणस्तरका बारेमा केही विवाद भएकाले ढिलो हुन सक्ने बताए । २०७८ साल असोज ३१ गतेदेखि कात्तिक ३ गतेसम्म आएको बेमौसमि बाढीका कारण कुचेखोलामा रहेको पक्की पुल एकातिर गाड एकातिर भएर समस्या समेत भएको छ । बाढीले निर्माणस्थल बगाएर लिएपछि ठेकेदार कम्पनीको अधिकाशं सामान बगाएर लिएपछि निर्माण कार्य अलि ढिला भएको समेत ठेकेदार कम्पनीले जनाएको छ ।

ठेकेदारहरुले काम लिने र निर्माण कार्य ढिला गर्ने परिपाटीले गर्दा पनि यस्तो समस्या हुने गरेको स्थानीय ईश्वर जोशीले बताए । निर्माण सुरु भएको पाँच वर्षसम्म पनि पुल नबनेपछि तमैलबाट खप्तडछान्ना गाउँपालिका बासिन्दाहरुले पैदल हिँडेर आवतजावत गर्नु पर्ने समस्या छ । सेती लोकमार्ग दक्षिणी खण्डका प्रमुख रमेश भण्डारीले भने, “सुरुवातमा ठेकेदार कम्पनीले ढिलाई गरेको थियो ।

निर्माण कार्य सुरु भएपछि कोरोना भाईरसको महामारी, बाढी लगायतका समस्याले निर्माण कार्य ढिलाई भएको हो ।” उनले जडार र कालिपछाईको पक्की पुलको गएको असार मसान्तसम्म सम्झौता अवधि भएपनि अझ म्याद थप गरि आउँदो असारसम्म निर्माण सकिने र विडिगाडको पक्की पुलमा कमसल सामग्री प्रयोग भएका कारण केही समस्या उत्पन्न भएको र अब समाधान गरिने समेत बताए ।

जडारर र कुचे खोलाको पक्की पुलको वारी पारिका पिल्लरहरु तयार गरिएका छन् भने ढलान लगायतका अधिकाशं काम गर्न अझै बाँकी छ । त्यसैगरी बिडिगाड पक्की पुलमा भने ढलान भईसकेको भएपनि कमसल सामग्री भएको भन्दै कार्यालयले पुन निर्माण गर्न निर्देशन दिएको छ ।
गोरखापत्रबाट