गोदावरी- लागुऔषधविरुद्ध जनचेतना जगाउन प्रहरीले घरदैलो अभियान थालेको छ । लागुऔषधको जालोमा किशोरकिशोरी तथा युवाहरु फस्न थालेपछि ‘लागुऔषधविरुद्वको महाअभियान २०८०’ अन्तर्गत प्रहरी घरदैलोमै पुग्न थालेको हो ।

अभियानअन्तर्गत कैलालीको इलाका प्रहरी कार्यालय मालाखेतीले लागुऔषधविरुद्ध गोदावरी नगरपालिकामा घरदैलो अभियान थालेको छ । इलाका प्रहरी कार्यालय मालोखेतीका प्रमुख प्रहरी नायव उपरीक्षक गणेश बरालले अभियान अन्तर्गत विहीबार बास्कोटा र शुक्रबार ३ नक्बर वडाको बिजौरा टोलमा लागुऔषधविरुद्ध घरदैलो गरिएको बताए ।

उनकाअनुसार पछिल्लो तीन दिन यता १३ सय जनाको घरदैलोमा पुगेर लागुऔषधविरुद्ध सचेत गराउँदै १५ सय पर्चा पम्पलेट वितरण गरिएको छ । लागुऔषध नियन्त्रण चुनौतीपूर्ण बन्दैगएपछि प्रहरीले घरदैलो अभियानमार्फत यसको नियन्त्रणका लागि अभियान सुरु गरेको छ ।

लागुऔषधको जालोमा किशोर तथा युवाहरु फस्न थालेपछि पछिल्लो समय दैनिकजसो पक्राउ पर्नेक्रम पनि बढेको छ । कैलाली प्रहरीको तथ्याङ्कअनुसार दैनिकजसो लागुऔषधका मुद्दा प्रहरीमा दर्ता हुनेगरेको छ । प्रहरीले साउन यता दुई महिनाको अवधिमा ८४ ओटा लागुऔषधका मुद्दा दर्ता गरेको जनाएको छ ।

महाभियान अन्तर्गत लागुऔषधविरुद्ध जनचेतना जगाउने, कानूनको कार्यान्वयन गर्ने र दुब््र्यसनमा फसेकालाई सुधार्ने लक्ष्य नेपाल प्रहरीले लिएको छ । लागुऔषध नियन्त्रण गर्न सर्वसाधारणमा जनचेतना फैलाउन प्रहरी कार्ययोजनासहित प्रदेशका सवै स्थानीय तहका वडामा पुगेर क्रियाशील रहेको सुदूरपश्चिम प्रदेश प्रहरी प्रमुख प्रहरी नायव महानिरीक्षक भरतबहादुर बोहराले बताए ।

“अहिले स्कूलका विद्यार्थीमाझ लागुऔषधविरुद्ध जनचेतना जगाउन कक्षा लिइरहेका छौँ । हामी यसरी नै समुदायमा पनि जान्छौँ” उनले भने, “नेपाल प्रहरीको केन्द्रीय कार्यालयले पनि कार्ययोजना बनाएको छ । प्रदेशमा पनि योजना बनाएर हामी लागुऔषधविरुद्ध महाअभियानमा गाउँसम्म पुग्दैछौं, यसमा हामी सबै पक्षसँग सहकार्य गर्छौँ ।”

प्रहरीको एकल प्रयासले मात्रै लागुऔषधको कारोबार रोक्न नसकिने भन्दै उहाँले समुदायले सहयोग गर्नुपर्ने प्रहरीको अपेक्षा रहेको बताए । सुदूरपश्चिमका कैलाली–कञ्चनपुरसहित पहाडी जिल्लामा समेत लागुऔषध प्रयोगकर्ताको संख्या बढेकाले लागुऔषधको कारोबार र ओसारपसार रोक्न सरकारी निकाय र समुदायको सहयोग आवश्यक रहेको उनको भनाइ छ ।

समुदायबाट कारोबारीलाई अलग्याएर सख्त कारवाही गर्न अहिले कारोबारीलाई कानून कारबाहीको पाटो अगाडि बढाइएको भन्दै प्रदेश प्रहरी प्रमुख बोहराले जनचेतना र कानून कारवाहीले मात्रै हुन्न भनेर दुव्र्यसनीहरूलाई सुधार्न सुधार गृह सञ्चालनमा ल्याइने बताए ।