बैतडी- सुदूरपश्चिम प्रदेशको पहाडी जिल्ला बैतडीको पाटनस्थित विमानस्थलमा विगत दुई वर्षदेखि प्रयोगविहीन अवस्थामा रहेको छ। हवाई सेवा बन्द हुँदा करोडौँ रुपियाँ लगानी गरी निर्माण गरिएका संरचना प्रयोगविहीन छन्।
सरकारको करिब १६ करोड रुपियाँ लगानीमा बनेका संरचना विमानस्थल, टर्मिनल भवन र रनवेलगायतका संरचना अलपत्र परेका छन्। केही वर्ष पहिले कैलाली–धनगढी–बैतडी–धनगढी १७ मिनेट हवाई दुरीमा समिट एयरले उडान सेवा सञ्चालन गर्दै आएको थियो।
तर २०७७ साल चैत १० गतेबाट उडान बन्द भएको थियो। २०७५ सालमा ११ करोड रुपियाँ खर्च गरेर २० मिटर चौडाइ र ५८० मिटर लम्बाइ रहेको विमानस्थल रनवे कालोपत्रे गरिएको थियो। त्यसमा थप पाँच करोड खर्च गरी टर्मिनल भवन निर्माण गरिएको हो।
विमानस्थल कालोपत्रे हुँदा खुसी देखिएका बैतडी जिल्लावासी अहिले निराश भएका छन्। राज्यको करोडौँ रुपियाँ लगानी त्यत्तिकै खेर गएको स्थानीय वसन्त विष्टले बताउनुभयो। सुक्को आम्दानी नहुने र प्रयोगमा नै नगर्ने भए सरकारले यति रकम लगानी गरेकोप्रति स्थानीय रुष्ट देखिएका छन्।
२०३६ देखि २०५२ सालसम्म नियमित उडान सेवा हुँदै आएको पाटन विमानस्थल माओवादी द्वन्द्वका बेला २०५२ सालदेखि बन्द रहेको थियो। विमानस्थल कालोपत्रे भएपछि हप्ताको एक दिन बैतडी–धनगढी उडान सेवा सञ्चालन गरेको थियो। हवाई उडान बन्द हुँदा गम्भीर प्रकृतिको रोग लागेका, दुर्घटनामा परेका व्यक्तिको आकस्मिक उद्धार गर्न कठिनाइ हुने गरेको पाटन नगरपालिकाका उपप्रमुख कमलसिंह बोहराले बताए ।
विमानस्थल सञ्चालनका लागि प्रदेश र सङ्घीय सरकारसँग पटक पटक माग राखे पनि कुनै सुनुवाइ नभएको उपप्रमुख बोहराले बताए । विमानस्थल बन्द हुँदा यहाँका प्रमुख धार्मिक तथा पर्यटकीयस्थलसमेत ओझेलमा परेका छन्।
