धनगढी- सुदूरपश्चिम प्रदेशका सामाजिक विकास मन्त्री झपटबहादुर साउदले १० वर्षे जनयुद्धको सफलता नै यसरी बोल्न र कार्यक्रम गर्न पाइएको बताएका छन् । सुप मिडिया हाउसको आयोजना तथा प्रदेश युवा परिषद् सुदूरपश्चिमको सहकार्यमा शनिवार धनगढीमा आयोजित युवाका सवालमा सामाजिक विकास मन्त्री सँग अन्तरक्रिया कार्यक्रममा मन्त्री साउले यस्तो बताएका हुन् ।
अहिले जनताको छोरो प्रधानमन्त्री अनि मन्त्री भएका छ, यो जनयुद्ध र जनआन्दोलनकै सफलता हो । हामी संघियताकै चरणमा छौँ यसको पूर्ण कार्यान्वयन अझै भइसकेको छैन् । तिन तहका सरकारका काम अझै जुधिरहेका छन् । अधिकार अझैँ बाँडफाँड भइसकेका छैनन्, त्यस कारण पनि संघियताको कार्यान्वयनमा कठिन भएको छ, तर केही भएन भन्ने होइन, हामीले युवाकै लागी पनि विभिन्न सचेतना कार्यक्रम, अभिमुखीकरण, सिपमूलक तालिम लगायत निकै कार्यक्रम ल्याएका छौँ,’मन्त्री साउद ।
प्रदेश सरकारले डाक्टर पढ्न जेहेन्दारलाई छात्रवृत्ति समेत दिँदै आएको बताए । स्वरोजगार बनाउने देखी, प्रमाणपत्र धितो राखेर श्रृण दिनेसम्मको व्यवस्था गरेको मन्त्री साउदले बताए । अहिले देशको स्थिति यस्तो छ त्यस कारण सोचे जस्तै बजेट आउन सकेन, भविष्यमा युवाका लागी राम्रै कार्यक्रम आउँछन् भन्नेमा बिश्वास गरौँ र सकारात्मक तिर ध्यान दिऔँ, केही छैन भन्ने होइन हामीले भएकै क्षेत्रमा सम्भावना खोज्ने मन्त्री साउदले बताएका छन् ।
कार्यक्रमका सहभागी दशरथ भट्टले प्रदेश सरकार युवामैत्री नभएको बताए । युवाका लागी मात्रै भनेर चासोका साथ बजेट राखिएकै पाइएन उनले भने, ‘हाम्रो क्षमता अभिवृद्धि, सिकाई लगायतका कामका लागी उचित बजेट राखिएको पाइएन, युवाहरू दिनप्रतिदिन लागु औषधको सिकार बनिरहेका छन्, यसको मुख्य कारण बेरोजगारी हो, यस सँगै सिपमूलक शिक्षाकै अभाव हो, सरकार नामको शिक्षा दिन्छ त्यसले झन् बेरोजगारी श्रृजना गरेको छ, युवाहरू विदेश पलायन भएर भविष्यमा साना बालबालिका र बृद्धबृद्धा मात्रै गाउँमा रहने स्थिति छ, सरकारको ध्यान कता छ मैले बुझ्न सकेको छैन ।’
यस्तै कार्यक्रममा सहभागी नबिता हमालले युवाका लागी जिल्लागत कार्यक्रम सरकारले ल्याउनुपर्नेमा जोड दिइन् । सरकारको लगानी आवश्यक नै हुन्छ, हामीलाई केही गर्न लायक बनाएर सक्दो स्वरोजगार बनाउने हो उनले भनिन् “सबै नराम्रो मात्रै पनि हुँदैन, सकारात्मक काम गरेर सकारात्मक कदमबाट सही मार्गमा हामी पुग्न सक्छौँ, त्यस कारण राज्यको सही ठाउँमा लगानी हुनुपर्छ र लगानी लगाइएको क्षेत्रलेपनि त्यसको सदुपयोग गर्नुपर्दछ ।
कार्यक्रममा प्रदेश प्रहरी कार्यालय सुदूरपश्चिमका प्रहरी उपरीक्षक श्याम सिंह चौधरीले प्रहरी लागु औषध नियन्त्रणका लागी नाकामै रोक्ने, कारबाही गर्ने देखी सुधार केन्द्रमा राखी उपचार गर्ने सम्मको काममा लागेको बताए । सुप मिडिया हाउस प्रा.ली का सञ्चालक दिनेश बिष्टले सञ्चालन गरेको कार्यक्रममा सञ्चालक शंकर बोहराले स्वागत गरेका थिए । कार्यक्रममा युवा, विद्यार्थी तथा सञ्चारकर्मी लगायतको सहभागिता थियो ।
