कञ्चनपुर- महाकाली नदीको रोयल्टी ठेक्का सम्झौता भएपछि बुधबार देखि नदीजन्य पदार्थ विक्रि, संकलनका लागि घाट खुलेको छ ।
भीमदत्त र दोधारा–चाँदनी नगरपालिकाले संयुक्त रुपमा महाकाली नदीको प्राकृतिक श्रोत नदिजन्य पदार्थ ९ढुङ्गा, गिट्टी, बालुवा तथा ग्राभेल आदी०को बिक्री शुल्क संकलन (रोयल्टी) का लागी ठेक्का खोलेका थिए । काठमाडौंको टाइगर–सगरमाथा जेभीले भ्याट रकम सहित ७ करोड ७७ लाखमा ठेक्का सम्झौता गरेपछि बुधबार देखि महाकाली नदीको घाट खुलेको नगरप्रवक्ता महेन्द्र खड्काले बताए ।

घाट खुलेपछि बुधवार नगरप्रमुख पदम बोगटी नेतृत्वको टोलीले महाकाली नदिको स्थलगत अनुगमन समेत गरेको छ । अनुगमनका क्रममा नगरप्रमुख बोगटीले महाकालीबाट नदिजन्य पदार्थको उत्खनन् एवं संकलन नदि किनारका बस्तीमा असर नपर्ने गरेर, किनारबाट ५ सय मिटर टाढाबाट मापदण्ड अनुसार गर्न सम्बन्धित पक्षलाई निर्देशन दिएका छन् ।

अनुगमनका क्रममा स्थानिहरुले नगरप्रमुख बोगटीलाई आफ्नो रोजीरोटी महाकाली नदिबाट बालुवा, गिट्टी संकलन गरेर चल्ने गरेको बताउँदै ठेक्का प्रक्रियाबाट घाट खोलेकोमा धन्यवाद व्यक्त गर्दै ऐरी घाट पनि छिट्टै खोल्न आग्रह गरे ।

‘भीमदत्त र दोधारा–चाँदनी नगरपालिकाको प्रमुख आयस्रोत नै महाकाली नदि हो ।’ नगरप्रमुख बोगटीले भने ‘बल्ल ठेक्का सम्झौता भएको छ, कुनैपनि बाहानामा ठेकेदारलाई दुःख दिने काम कसैले नगर्नु होला ।’ उनले अगाडि भने, ‘बाँकी नदि किनारका बस्तीलाई असर नपर्नेगरी, मापदण्डअनुसार नै नदिजन्य पदार्थ संकलन एवं उत्खनन् गर्न सम्बन्धित पक्षलाई सबैले खवरदारी गर्नुपर्छ ।’ महाकाली नदीको नदीजन्य पदार्थ रोयल्टीमा दोधारा चाँदनी र भीमदत्त नगरपालिकाले क्रमशः ४६ र ५४ प्रतिशत लिने सम्झौता भएको छ ।