बैतडी- सिगासको थलागाउँको दलित बस्तीमा खानेपानी नहुँदा २५० घरधुरीका मानिस एक घण्टा ओराले झरेर ढडेखोलाको पानी पिउन बाध्य छन् । सिगास गाउँपालिका–६, थला गाउँको दलित बस्तीमा खानेपानीको धारा नहुँदा यस्तो समस्या भएको हो ।
खानेपानीको अभावमा बस्ती काकाकुल बनेको स्थानीय नरेन्द्र विकले बताए । हिउँदमा खोलाको पानी र बर्खा लागेपछि आकासे पानी पिउनुपर्ने दलित समुदायको बाध्यता रहेको उनले बताए ।
साँझ, बिहान र दिउँसो गरेर तीन पटक पानी भर्न जाँदा अधिकांश समय पानी भर्नमै बित्ने गरेको उनले बताए । सङ्घ र प्रदेशका नेताले वाचा बिर्सिएको यहाँका दलित समुदायको गुनासो छ । “चुनावका बेला सबै नेताले घर घरमा धारा दिन्छौँ भनेपछि हामीले भोट दिएर जितायौँ, चुनाव जितेपछि कोही फर्केनन् ।
दलित बस्तीको समस्या जस्ताको तस्तै रहेको छ” उनले भने । वडा कार्यालयमा पानीको माग आए पनि पर्याप्त बजेट नभएको सिगास गाउँपालिका–६ का वडाध्यक्ष जेतबहादुर साउदले बताए ।
