धनगढी- संघीय निजामती सेवा ऐन अविलम्ब जारी गर्न माग गरिएको छ । एकीकृत सरकारी कर्मचारी संगठन नेपालले यस्तो माग गरेको हो । धनगढीमा सम्पन्न भएको प्रदेश अधिवेशनले संघीय निजामती सेवा ऐन जारी लगायतका ९ बुँदे माग अगाडि सारेको हो । धनगढीमा आइतबार पत्रकार सम्मेलन गरेर अधिवेशनमा भएको छलफलका बारेमा जानकारी दिएको छ ।

संघीय निजामती सेवा ऐन जारी गर्न नसक्दा प्रशासनिक संघीयताले पूर्णता प्राप्त गर्न नसकेकोले जनमैत्री र कर्मचारी मैत्री ऐन पारित हुन नसक्दा समस्या भइरहेको संगठनका महासचिव पुरुषोत्तमप्रसाद भट्टले बताए । जहाँ सरकार त्यहाँ ट्रेड युनियन भन्ने मान्यतामा संगठन दृढ रहेको र तिनै तहको सरकारमा ट्रेड युनियन अधिकारको सुनिश्चित गर्न माग गरेको छ ।

सुदूरपश्चिम प्रदेश सरकारले जारी गरेको प्रदेश निजामती सेवा ऐन निर्माणको क्रममा ट्रेड युनियनहरूको प्रभावकारी उपस्थितिको लागि प्रदेश सरकारको तर्फबाट यथेष्ट पहल नभएको प्रति अधिवेशनको गम्भीर ध्यानाकर्षण भएको संगठनका महासचिव भट्टले बताए । प्रदेश निजामती सेवा ऐनमा भएका त्रुटिहरू सच्याउन प्रदेश सरकार समक्ष माग गरेको छ । सबै तहको कर्मचारीहरूको समान वृत्ति विकासको र सरुवाको ग्यारेन्टी गर्न माग गरेको छ । प्रदेश भित्रको अन्तर स्थानीय तहको सरुवा मापदण्ड बनाई कार्यान्वयन गर्न माग गरिएको संगठनका प्रदेश अध्यक्ष जनकराज जोशीले बताए ।

यस्तै गरी करार ज्यालादारी कर्मचारीहरूको सेवा सुरक्षा र सामाजिक सुरक्षा कोषमा आबद्धताको माग गरिएको छ । अस्थायी र करार सेवाका कर्मचारीहरूलाई एक पटकको लागि मान्य सिद्धान्तको आधारमा स्थायी गर्न र स्थायी हुन नसक्ने राष्ट्रसेवकहरूको हकमा जीवन वृत्तिको ग्यारेन्टी सहित अवकाश योजनाको व्यवस्था गर्न संठनले माग गरेको छ ।

कर्मचारीहरूको कार्य थलोमा सुरक्षाको ग्यारेन्टी गर्न समेत माग गरिएको छ । प्रदेश सरकारको संगठन संरचना ओएनएमको सुनिश्चित गर्न जोड दिएको छ । प्रदेश निजामती सेवा नियमावली जारी ढिलो नगरी सरोकारवाला ट्रेड युनियनहरूको सक्रिय सहभागितामा स्थानीय सेवा ऐन जारी गर्न माग गरिएको छ ।

प्रदेश सरकारले कर्मचारी सरुवाको चक्रीय र पक्षपातरहित सरुवा प्रणालीको व्यवस्था गर्न माग गरिएको छ । यस्तै गरी सुशासन र क्षतिपूर्ति सहितको प्रदेश सरकारको सार्वजनिक सेवाको व्यवस्था गर्न जोड दिएको छ । एकीकृत सरकारी कर्मचारी संगठन नेपाल संघीयतामा संघ प्रदेश स्थानीय तह का सबै प्रकृतिका सेवामा रहेका कर्मचारीहरूको प्रतिनिधित्व गर्ने गरी देश भरिका कर्मचारीहरूद्वारा स्थापना गरिएको संगठन हो ।

सुदूरपश्चिम प्रदेश शनिवार अधिवेशन भएको हो । संगठनको केन्द्रीय उपाध्यक्ष एवं सुप प्रदेश इन्चार्ज निर्प जोशीको अध्यक्षतामा धनगढी सम्पन्न भएको हो । अधिवेशनको उद्घाटन सत्रको प्रमुख अतिथि नेकपा (एकीकृत समाजवादी) का केन्द्रीय सदस्य एवं सुदूरपश्चिम प्रदेशसभाका दलका नेता दीर्घ सोडारी रहेका थिए ।

अधिवेशनमा संगठनका वरिष्ठ उपाध्यक्ष यामबहादुर खत्री, केन्द्रीय उपाध्यक्षहरू जयदेव जोशी, दिनेश लम्साल, शेरसिंह भण्डारी, महासचिव प्रकाश राई, सचिव हरिहर गौतम, पेशागत महासंघका प्रदेश अध्यक्ष कवीन्द्र चन्द लगायतको उपस्थिति रहेको थियो । अधिवेशनले जनकराज जोशीकी अध्यक्षतामा १३ सदस्यीय प्रदेश कार्यसमिति गठन समेत गरेको हो ।