धनगढी- एसियाली विकास बैंकको ऋण सहयोगमा धनगढीमा बनिरहेका सडक चौथोपटक म्याद थप भएको छ । धनगढीको मुख्य बजारको कैलाली पुलदेखि ट्राफिक चौराहासम्मको सडक, सहिदगेटदेखि क्याम्पसरोड, गुल्म चर्च सडक, क्याम्पसचोकदेखि क्याम्पस गेट, डिभोटी होटलदेखि पिपलचौतरा, पिपल चौतारादेखि लवलीचोक, मालपोत रोड र ज्योती रोड गरी आठवटा सडकहरुको बाँकी काम गर्न समय थप गरिएको हो ।
यी आठवटा सडकहरुको लम्बाई १०.८ किलोमिटर छ । यी सबै सडको ठेक्का एकै प्याकेजमा भएको थियो । यी सडक दुई वर्षभित्र निर्माण गरिसक्ने सर्तसहित कालिका कन्स्ट्रक्सनसँग २८ असार ०७७ मा सम्झौता भएको थियो । तेस्रोपटक थप गरिएको समयावधि सकिदा समेत सडक निर्माण हुने सकेको छैन् । तेस्रोपटक थप गरिएको अवधि गत कात्तिक १४ मा सकिएको छ ।
तेस्रोपटक थप गर्दा पनि काम पूरा नभएपछि चौथोपटकका लागि पाँच महिना म्याद थप्न केन्द्रमा सिफारिस गरिएको थियो । केन्द्रको सिफारिस अनुसार कात्तिक १५ गतेदेखि चैत्र १८ गते सम्मका लागि म्याद थप भएर आइसकेको आयोजनाले जनाएको छ । तेस्रो पटक म्याद थप गर्दा पनि केही समस्याले गर्दा काम सम्पन्न गर्न नसकिएको आयोजना कार्यान्वयन इकाई कार्यालयका सूचना अधिकारी सौरभ कलौनीले बताए ।
विद्युत पोल, टेलिकम र खानेपानीले गर्दा समयमै काम सम्पन्न हुन नसकेको उनले बताए । थप भएर आएको म्याद भित्रै काम सम्पन्न हुने उनले दाबी गरे । विद्युत पोल र खानेपानीको समस्या ९५ प्रतिशत समस्या समाधान भइसकेकाले गर्दा अब काम समयमै काम सक्कनेमा आफूहरु आसावादी रहेको सूचना अधिकारी कलौनी बताउछन् । हालसम्म सडकको भौतिक प्रगति करिब ८७ प्रतिशत सम्पन्न भएको उनले बताए ।
सुदूरपश्चिम क्षेत्रीय सहरी विकास आयोजना कार्यान्वयन इकाई अन्तर्गत ७७ करोड ६० लाख ८२ हजार रुपैयाँ लागतमा फुटपाथ, नाली र सडक बत्ती भएको आधुनिक सडक निर्माण भइरहेको हो । हाल सम्म ५० प्रतिशत बजेट खर्च समेत भइसकेको उनको भनाइ छ । केही सडकमा फिनिसिङको काम बाँकी रहेको फिनिसिङ गरिरहेको उनले बताए ।
