धनगढी- नेपाल पत्रकार महासंघ केन्द्रीय समितिले निर्वाचन समितिलाई बुझाएको मतदाता नामावली प्रति सुदूरपश्चिम प्रदेशका ९ वटै जिल्ला शाखा र प्रदेश समितिले गम्भीर ध्यानाकर्षण भएको जनाएको छ ।

आज एक प्रेस विज्ञप्ती जारी गर्दै प्रदेश समिति र नै वटै जिल्ला शाखाले ध्यानाकर्ष भएको जनाएको हो । विज्ञप्तीमा भनिएको छ ‘नेपाल पत्रकार महासंघको सदस्यता शुद्धिकरण अभियानको पूर्ण समर्थन सहित केन्द्रीय समितिले बनाएको मापदण्ड र सर्कुलर अनुसार जिल्लास्तरवाटै सर्वसम्मत रुपमा प्रदेश समिति मार्फत केन्द्रीय समितिलाई सिफारिस गरिएको सदस्यतालाई केन्द्रीय समितिले आफू अनुकुल पर्ने सदस्यहरुलाई विधी प्रक्रिया मिचेर थप्ने तथा हटाउने गरेको प्रति हाम्रो असहमती रहेको छ ।’

‘निर्वाचनको मिति आउन १२ दिन मात्र बाकी रहँदा जिल्ला र प्रदेशमार्फत पठाएको सदस्यतालाई गिजोलेर निर्वाचनको वातावरण विथोलिएको हाम्रो ठहर छ।’ जारी विज्ञप्तीमा उल्लेख छ । ‘प्रकृया, मापदण्ड अनुसार पठाएको सिफारिस विपरित सार्वजनिक गरिएको नामावली तत्काल नसच्याइए निर्वाचनका कुनै पनि गतिविधीमा संचालन गर्न नसकिने यो प्रेस विज्ञप्ती जानकारी गराउँदछौं’ जारी विज्ञप्तीमा उल्लेख छ,‘साथै यसवाट उत्पन्न हुने सम्पूर्ण परिस्थितिको जिम्मेवारी नेपाल पत्रकार महासंघ केन्द्रीय समितिले लिनुपर्ने छ ।’