धनगढी । सुदूरपश्चिम प्रदेशकै प्रमुख रेफर अस्पतालका रूपमा रहेको सेती प्रादेशिक अस्पतालमा तीन सातादेखि सिटी स्क्यान सेवा बन्द भएको छ ।
सिटी स्क्यान मेसिनको पार्टपुर्जा बिग्रिएपछि २१ दिनदेखि सेवा अवरुद्ध भएको हो । सेवा बन्द हुँदा प्रदेशका विभिन्न जिल्लाबाट उपचारका लागि आउने बिरामी प्रभावित भएका छन् ।
सिटी स्क्यान सेवा बन्द विशेषगरी आर्थिक अवस्था कमजोर भएका तथा विपन्न नागरिकले निजी अस्पतालमा महँगो शुल्क तिरेर सिटी स्क्यान गराउनुपर्ने बाध्यता छ ।
सेती प्रादेशिक अस्पतालमा दैनिक १ हजार २०० देखि १ हजार ५०० जनासम्म बिरामीले विभिन्न स्वास्थ्य सेवा लिने गरेका छन् । अस्पतालमा दैनिक करिब २० जनाले सिटी स्क्यान सेवा लिँदै आएका थिए । तर, लामो समयदेखि सेवा बन्द हुँदा उपचारका लागि अस्पताल पुग्ने बिरामीले थप आर्थिक भार व्यहोर्नुपरेको छ ।
जीई कम्पनीको सिटी स्क्यान मेसिनको पार्टपुर्जा बिग्रिएपछि सेवा सञ्चालनमा समस्या आएको अस्पतालका सूचना अधिकारी किशोरप्रसाद श्रेष्ठले जानकारी दिए । बिग्रिएको पार्टपुर्जा नेपालमा उपलब्ध नभएकाले विदेशबाट मगाउनुपरेको उनले बताए ।
सेती प्रादेशिक अस्पतालमा २०७९ साल पुसदेखि सिटी स्क्यान सेवा सञ्चालनमा आएको हो । अस्पतालमा उपलब्ध यो सेवा विशेषगरी जटिल स्वास्थ्य समस्या पहिचान र उपचारका लागि महत्वपूर्ण मानिन्छ ।
सेवा बन्द भएपछि अस्पतालमा उपचारका लागि पुगेका बिरामीले स्वास्थ्य सेवा प्रभावकारी हुन नसकेको गुनासो गरेका छन् । उनीहरूले अस्पतालमा पटक–पटक देखिने समस्याको तत्काल समाधान गर्न माग गरेका छन् ।
