धनगढी- धनगढीमा जारी प्रथम सन्ध्याकालीन सांस्कृतिक मिनी मेला सम्पन्न भएको छ । धनगढी उपमहानगरपालिका वडा नम्बर १ खुला मञ्चमा जेठ १ गते देखी सुरु भएको प्रथम सन्ध्याकालीन सांस्कृतिक मिनी मेला २०८१ सम्पन्न भएको हो । शनिवार एक औपचारिक कार्यक्रमका बिच सुदूरपश्चिम प्रज्ञा प्रतिष्ठानका उपकुलपति डा. टिएन जोशीको प्रमुख आतिथ्यतामा कार्यक्रम समापन गरिएको हो ।
मेलामा स्थानीय कलाकारको प्रस्तुति, विद्यालय स्तरीय नृत्य प्रतियोगिता, खुल्ला गायन प्रतियोगिता तथा विविध सांस्कृतिक कार्यक्रम गरिएको आयोजक द टुविन्स अ कम्पीलीट इन्टिचिउट अफ डान्स धनगढीका सञ्चालक केशव बलायरले बताए । उनले पर्यटन प्रवर्द्धन, सांस्कृतिक कार्यक्रमद्वारा मानिसलाई स्वास्थ्य, मनोरञ्जन प्रदान गर्ने उद्देश्यले पहिलो पटक प्रथम सन्ध्याकालीन सांस्कृतिक मिनी मेला आयोजना गरिएको बताए ।
बाल उद्यान (रोटेपिङ्ग, मिक्की माउस, ढुंगापिङ्ग आदि), चर्खा लगायत मनोरञ्जनका सामाग्री मार्फत मनोरञ्जन प्रदान गरिएको थियो । खानपिनका स्टल, इच्छुक व्यापारिक स्टलहरू, विभिन्न स्टलहरू राखिएका थिए । मिनी मेला समापन कार्यक्रममा विभिन्न व्यक्ति, सहयोगी संस्थालाई मायाको चिनो र प्रशंसा पत्र प्रदान गरिएको थियो ।
