धनगढी- कैलालीमा सुदूरपश्चिम प्रदेशमा क्रियाशील पत्रकारहरूलाई संसदीय रिपोर्टिङ सम्बन्धी २ दिने क्षमता अभिवृद्धि प्रशिक्षण दिइएको छ ।
संसदीय मामिला पत्रकार समाज कैलालीको आयोजनामा चिसापानीमा शुक्रबारदेखि सुरू भएको प्रशिक्षण शनिबार सम्पन्न भएको हो।
युएनडीपीको संसद सहयोग परियोजनाको सहकार्यमा आयोजित कार्यक्रममा संसदीय रिपोर्टिङ सम्बन्धीे क्षमता अभिवृद्धिबारे पत्रकारलाई प्रशिक्षण दिइएको थियोे ।
संसदीय पत्रकारितामा लामो अनुभव भएका अनलाइनखबरका प्रधान सम्पादक शिव गाउँले, बाह्रखरीका विशेष सम्पादक हरिबहादुर थापा र न्यूज एजेन्सी नेपालकी सम्पादक कृष्णा पौडेलले प्रशिक्षण दिएका थिए ।
प्रशिक्षकले संसदीय रिपोर्टिङका आधारभूत कुरा, रिपोर्टिङका विषय, संसदभित्र के–कस्ता मुद्दाहरू उठान गर्ने लगायतका विषयबारे समेत प्रशिक्षण दिएका थिए ।
यस्तै, संसदीय पत्रकार समाजले शनिबार नै प्रदेश सभा सदस्यहरूसँग अनुभव आदानप्रदान तथा अन्तरक्रिया समेत गरेको थियो । सो क्रममा पत्रकारहरूले प्रदेश सभामा समाचार संकलनका क्रममा व्यहोर्नुपर्ने परेका जटिलतालगायतका बिषयमा आफ्ना अनुभव सुनाएका थिए । पत्रकारहरूले प्रदेशसभासँगै विषयगत समितिको बैठकहरूमा समेत समाचार संकलनका लागि सहज र नियमित रूपमा सहभागीता गराउनुपर्ने जोड दिए ।
प्रदेश सभा सदस्यहरूले सञ्चार माध्यमले खेल्नुपर्ने भूमिकाबारे धारणा राखेका थिए ।अन्तरक्रिया कार्यक्रममा सुदूरपश्चिम प्रदेशसभा
धर्मराज पाठक, डा. ताराप्रसाद जोशी, जानकी पौडेल र रामेश्वर चौधरी तथा जानकी गाउँपालिकाका अध्यक्ष गणेश चौधरीको सहभागीता थियो ।
सच्चितानन्द जोशीले सहजीकरण गरेको कार्यक्रममा युएनडिपीको संसद सहयोग परियोजनाकी संसद मामिला अधिकृत क्यारिना श्रेष्ठले कार्यक्रमको उदेश्यबारे जानकारी दिएकी थिइन् ।
