धनगढी । सुदूरपश्चिम प्रदेशका मुख्यमन्त्री कमलबहादुर शाहले वर्तमान सरकार निरन्तर अगाडि बढेर जाने बताएका छन् ।
बुधबार धनगढीमा आयोजित नेपाल पत्रकार महासंघ सुदूरपश्चिम प्रदेश समितिका नवनिर्वाचित पदाधिकारी तथा सदस्यहरुको पदस्थापन कार्यक्रममा बाल्दै उनले यस्तो बताएका हुन् ।
उनले भने ‘वर्तमान सरकार र नेतृत्वका बीचमा भएको समझदारी निरन्तर अगाडि बढेर जान्छ । यसमा सहमतिका प्रयासहरु विधि,पद्धति,मुल्य र मान्यतालाई स्थापित गर्न यो निर्वाचनले मुलुक र जनतालाई राम्रो सन्देश दिएको छ ।’
उनले पत्रकार महासंघको निर्वाचनले राजनीतिक स्थिरता विकास र समृद्धिका सवालमा अहिलेको सत्ता गठबन्धनको लक्ष्य प्राप्तिका लागि वातावरण बनाउने सन्देश पनि दिएको बताएका छन् ।
मुख्यमन्त्री शाहले भने ‘पत्रकार महासंघले अन्यौलताका बीचमा केन्द्रदेखि जिल्लासम्म निर्वाचन पूरा गरेर पुनः एकचोटी लोकतान्त्रिक मूल्य र मान्यतालाई स्थापित गरेको छ ।’ मुख्यमन्त्री शाहले नवनिर्वाचित पदाधिकारी तथा सदस्यहरुलाई बधाई तथा शुभकामना समेत व्यक्त गरेका थिए ।
पदस्थापन कार्यक्रममा नवनिर्वाचित प्रदेश पदाधिकारी तथा सदस्यहरुलाई निर्वाचित भएको प्रमाणपत्र प्रदान गरिएको थियो ।
