धनगढी । नेपाल–भारत सीमावर्ती क्षेत्रमा भारतीय एसएसबीबाट नेपालीले सास्ती खेप्नुपरेको कुरा नौलो होइन् । भारतले  सीमा पिल्लर सार्दै नेपाली भूमि मिच्ने गरेको बिषय पनि नयाँ होइन् । तर  एसएसबीले सडक निर्माणमा समेत हस्तक्षेप गर्दै आएको भन्ने कुरा नयाँ हो । कञ्चनपुरको बेलौरी नगरपालिका–८ स्थित हुलाकी राजमार्ग निर्माणमा भारतीय एसएसबीले हस्तक्षेप गर्दै आएको स्थानीय बताउँछन् ।

कञ्चनपुरको बेलौरी नगरपालिका–८ का वडाध्यक्ष विषराम रानाले नेपाल र भारतको सीमामा पर्ने ३८ नम्बर पिल्लरदेखि पूर्व कालोपुलसम्म १ हजार २ सय मिटर हुलाकी राजमार्ग निर्माणमा हस्तक्षेप गरेको बताएका छन् ।

उनले भने ‘भारतीय एसएसबीले हामीलाई उक्त सडक मर्मत पनि गर्न दिएको छैन । हात लगाउन पनि दिँदैन । सम्झाउँदाखेरि पनि यो जमिन भारतको हो तिमीहरु यहाँ नआउ । यो भारतको नक्सामा पर्छ भन्ने गरेको छ ।’

नागरिकले वर्षातको समयमा उक्त सडकमा हिडडुल गर्न समेत सास्ती खेप्नुपरेको उनले बताए । उनले भने ‘वर्षातको समय सुरु भएको छ । त्यहाँ पानी भरियो भने पनि निकास गर्दाखेरि एसएसबीले पानी पनि निकास गर्न दिँदैन । बढी विवाद गर्यो भने ब्यारेल लगाउँछौँ  भनेर धम्की दिने गर्छन् ।’

पटकपटक वडाबाट भन्दा पनि त्यहाँ मर्मत सडक मर्मत समेत गर्न नदिएको तथा एसएसबीले आफ्नो मनमर्जी गरिरहेको उनको भनाइ छ ।
‘भारतीय एसएसबी त्यो बाटोमा साँझबिहान हिँडिरहेका हुन्छन् । त्यसलाई आफ्नो निगरानीमा राखेको हुन्छ’, उनले भने ‘वडा नम्बर ८ का जनतालाई त्रसित बनाएको छ । वडा नम्बर ८ को सीमा ३९ नम्बर पिल्लरदेखि वडा नम्बर ७ को कालोपुलसम्म २४ सैं घण्टा एसएसबीले निगरानी गरिरहेको हुन्छ ।’

सीमा क्षेत्रमा नेपालीहरुले आफ्नै जग्गा समेत भोगचलन गर्न नपाएको उनले बताए । उनले भने ‘सो क्षेत्र नजिकका नेपाली जमिनमा नेपाली जनताले खेतीपाती लगाउँदा,भोगचलन गर्दाखेरि पनि उनीहरूले अवरोध गर्ने गरेका छन् । भारतीय एसएसबीले हुलाकी बाटोतिर जान दिँदैन । हामीले पनि एकपटक सरसफाई अभियान चलाएका थियौँ । यता आउन मिल्दैन । यो भारतको जमिन हो यता आउन पाइँदैन भन्यो ।’

नेपाली नगरिकका लागि भारत आवतजावतमा समस्या गरे आफूहरुले त्यहाँ प्रधानसँग समन्वय गरेर सहजीकरण गर्ने गरेको उनले बताए । उनले भने ‘सीमा समस्या अन्तर्राष्ट्रिय मामिला हो । यो नेपाल सरकारको समस्या हो । व्यक्तिगत समस्या होइन । सरकारबाट कुनै पहल भइरहेको छैन जस्तो लाग्छ ।’

उनले भने ‘नगरपालिकाबाट सङ्घीय र प्रदेश सरकारलाई ज्ञापनपत्र दिएका छौँ । त्यहाँबाट केही पनि भएको छैन । सीमा सम्बन्धी समस्या समाधानका लागि नेपाल सरकारले पहल गर्नुपर्ने कुरा हो ।’

उनले भने ‘हामीले सरकारलाई गुहार गर्दा सुन्दैन । नेपाल सरकारको कमजोरी हो । यसमा सरकारले पहल गर्न आवश्यक देखिन्छ ।’