धनगढी । कैलाली भन्सार कार्यालय प्रमुख अनन्त तिमिल्सिनालाई कुटपिट गरेको आरोपमा धनगढी उपमहानगरपालिकाका नगर प्रहरी निरीक्षक लक्ष्मणसिंह धामीसहित ४ जना पक्राउ परेका छन् ।
जिल्ला प्रहरी कार्यालय कैलालीका अनुसार नगर प्रहरी निरीक्षक धामीसहित नगर प्रहरी हवल्दार मणीदत्त भट्ट,नगर प्रहरी जवान जितेन्द्रसिंह धामी र सवारी चालक रतन मल्ल पक्राउ गरिएको हो ।
शनिबार राति भन्सार कार्यालय प्रवेश गरि कार्यालय प्रमुख तिमिल्सिनालाई कुटपिट गरेको सिसीटिभी फुटेज आइतबार बाहिरिएको थियो । आइतबार नै कार्यालय प्रमुख तिमिल्सिनाले धनगढी उपमहानगरपालिकामा कार्यरत नगर प्रहरी प्रमुख प्रहरी निरीक्षक लक्ष्मणसिंह धामीको कमाण्डमा खटिगएको टोलीले भन्सार कार्यालयको हाता भित्र आई अभद्र व्यवहार गरी कुटपिट गरेको भनि जिल्ला प्रहरी कार्यालय उजुरी दिएको जनाइएको छ ।
पक्राउ परेका चारै जनामाथि थप अनुसन्धान कार्य भइरहेको जनाइएको छ । आइतबार नै धनगढी उपमहानगरपालिकाले नगर प्रहरी निरीक्षक धामीलाई २४ घण्टे स्पष्टिकरण सोधेर कारवाही प्रक्रिया अघि बढाइसकेको छ ।
