कैलाली । यातायात व्यवसायीले देशभर अनिश्चितकालीन यातायात बन्दको प्रभाब सुदुरपश्चिममा पनि परेको छ । ‘सार्वजनिक यातायात बचाउ केन्द्रीय संघर्ष समिति’को आह्वानमा सोमबारदेखि देशभरका सार्वजनिक यातायात बन्दको घोषणा गरिएको थियो । आज बिहानैबाट बन्दको प्रभाब सुदुरपश्चिममा परेको हो ।
आफूहरूले गण्डकी प्रदेश सरकारले ‘राइड सेयरिङ’को नाममा निजी प्रयोजनको लागि खरिद गरिएका सवारी साधनलाई भाडाका सवारी साधन सरह प्रयोग गर्न दिनेगरी ल्याएको नियमावली खारेजीको माग गर्दै आन्दोलनको घोषणा गरिएको सुदुरपश्चिम यातायातका उद्धार उपाध्यक्ष रमेश उप्रेतीले बताए ।
धनगढी , अत्तरिया लगाएत सुदुरपश्चिमका सबै क्षेत्रमा यातायात व्यवसायीहरुले सार्वजनिक यातायात मात्रै नभई अटोरिक्साहरु समेत बन्द गरेको उनले बताए ।
उनले कालो नम्बर प्लेटका सवारी साधनहरु मात्रै नभई यात्रु बोकिरहेका सबै सवारी साधनहरु बन्द भैरहेको बताए ।
‘अटोरिक्साहरु पनि कालो नम्बर प्लेटका नै हुन, उनिहरुले राम्ररी नबुझेका हुनाले उनिहरुलाई सम्झाएर हामी अटोरिक्सा पनि बन्द गरिरहेका छौ’ उनले भने ‘त्यसबाहेक अन्य यात्रु बोक्ने सबै सवारी साधनहरु अनिश्चितकालका लागि बन्द छन ।’
उनले निजि सवारी साधनहरुलाई भने आवतजावतमा कुनै रोक नभएको बताए ।
