धनगढी । उपप्रधान तथा शहरी विकास मन्त्री प्रकाशमान सिहंले कर्मचारीको गल्तीलाई लिएर मन्त्रीको राजिनामा माग्नु उपयुक्त नभएको बताएका छन् । नेपाल प्रेस युनियन कैलालीले बिहीबार धनगढीमा आयोजना गरेको पत्रकार सम्मेलनमा बोल्दै उनले यस्तो बताएका हुन् ।

उनले भने ‘मन्त्रीको नाममा कतै उजुरी पनि परेको छैन् । अख्तियारले छानबिन गरिरहेको छ । मन्त्रीका राजिनामा माग्नु उचित हैन् ।’ । अख्तियारको छानबिन चलिरहेकै बेला सोझै गृहमन्त्रीको राजिनामा मागेर सदन अवरुद्ध गर्नु ठिक नभएको उनले बताए । गृहमन्त्री रमेश लेखकको नाम अहिलेसम्म कतै नजोडिएपनि विपक्षी दलहरुले राजिनामा मागेको भन्दै उनले आपत्ति जनाए । प्रतिपक्षी दलहरुले गृहमन्त्री रमेश लेखकको राजिनामा माग्दै सदन अवरुद्ध गर्दै आएका छन् ।

सदनको अवरोध हटाउन शीर्ष नेताहरुबीच छलफल चलिरहेको बताउँदै सिहंले छिट्टै सदन सञ्चालन हुने विश्वास व्यक्त गरे । मन्त्री सिहंले सरकार आफ्नो गतिमा अघि बढिरहेको बताए । कांग्रेस भित्रैबाट सरकारको विकल्प खोजिन थालेको छ नि ? भन्ने सञ्चारकर्मीको प्रश्नमा सिहंले सरकार ठिक दिशामा अगाडि बढेको दावी गरे । सरकार गठनका बेला भएका सहमती अनुसारनै नेतृत्व अगाडि बढेको बताउँदै उनले गठबन्धनबाट चलेको सरकार एक व्यक्तीले भनेजस्तै चल्न नसक्ने स्पस्ट पारे । सविधान संशोधन लगायतका विषय चरणबद्ध रुपमा अगाडि बढ्ने उनको भनाइ थियो ।

सिहंले एशियाली बिकास बैंकको ऋण सहयोगमा कैलाली र कञ्चनपुरमा सञ्चालित योजनाले गति लिइरहेको दावी गरे । सोही योजना अन्तर्गतको गोदावरी नगरपालिकामा निर्माण फोहोरमैला व्यवस्थापन केन्द्रको आज उद्घाटन गरेका मन्त्री सिहंले धनगढीमा पनि फोहोरमैला व्यवस्थापन केन्द्र निर्माण कार्यले गति लिएको बताए ।