धनगढी । प्रेस सेन्टर नेपाल सुदूरपश्चिम प्रदेश समितिको तेस्रो पूर्ण बैठक विविध निर्णयहरू गर्दै सम्पन्न भएको छ । आइतबार प्रदेश समितिको तेस्रो पूर्ण बैठक कञ्चनपुरको महेन्द्रनगरमा सम्पन्न भएको हो ।
बैठकमा बोल्दै प्रेस सेन्टर नेपालका केन्द्रीय अध्यक्ष कमल गिरीले अबको पत्रकारिता प्रविधिमैत्री हुनुपर्ने बताए । उनले समयानुकुल पत्रकारिता आवश्यक रहेको बताए । उनले पत्रकारले शोषित,उत्पीडितका आवाजहरु बुलन्द गर्नु पर्नेमा जोड दिए । पत्रकारिता जनताको पक्षमा हुने बताउँदै उनले पत्रकार मजदुर हुने बताए ।
माओवादी केन्द्रका केन्द्रीय सदस्य एवं सुदूरपश्चिम प्रदेश प्रचारप्रसार विभाग प्रमुख ओमविक्रम भाटले सबै भन्दा बढी राष्ट्रियता,सामाजिक न्याय,सुशासनका पक्षमा काम गर्ने पार्टी माओवादी केन्द्र नै भएको बताए । उनले देशव्यापीरुपमा माओवादीले चलाएको अभियानमा जनताले ठूलो साथ दिएको बताए ।
माओवादी केन्द्रका सुदूरपश्चिम प्रदेशका सह–सचिव तथा प्रेस सेन्टरका फ्याक्सन इन्चार्ज केशवनाथ योगीले समाज रुपान्तरण गर्न पत्रकारको भूमिका महत्वपूर्ण भएको बताए । उनले समाजवादको आधार तयार गर्न जनतालाई जोड्नु पर्नेमा जोड दिए ।
बैठकमा प्रेस सेन्टर नेपालका केन्द्रीय उपाध्यक्षहरू रामसिंह ठगुन्ना र लक्ष्मण खड्का, महासचिव मनोज घर्तीमगर,उपमहासचिव हरिश विक,पुर्व केन्द्रिय सदस्य टँक कुंवर र सचिवहरु मानसिंह विक र राजेन्द्र अवस्थीले मन्तव्य व्यक्त गरेका थिए ।
बैठकमा जिल्ला अध्यक्षहरुले आ–आफ्नो जिल्लाको समग्र अवस्थाको रिपोर्रिटिङ गरेका थिए । प्रेस सेन्टर नेपाल सुदूरपश्चिम प्रदेश समितिका अध्यक्ष केशवाज जोशीको अध्यक्षतामा बसेको बैठकको सञ्चालन महासचिव तेजराज भट्टले गरेका थिए । बैठकमा संगठनात्मक सुदृढीकरण,पत्रकार सुरक्षालगायत विषयमा छलफल गरिएको थियो । सुदूरपश्चिम प्रदेश समितिका पदाधिकारी,सदस्यहरू, सबै जिल्लाका अध्यक्ष तथा प्रतिनिधिहरू सहभागी थिए ।
