धनगढी । सुदूरपश्चिम प्रदेशका मुख्यमन्त्री कमलबहादुर शाहले बजेट निर्माणका क्रममा गतल मनसाय र गलत उदेश्यले संवाद गर्नेलाई कानूनी कार्बाही गरिने बताएका छन् ।
आइतबार मुख्यमन्त्री तथा मन्त्रिपरिषदको कार्यालयमा आयोजित पत्रकार सम्मेलनमा उनले भ्रष्टाचारमा शुन्य सहनशिलताको नीति लिएको प्रदेश सरकारलाई यस्ता किसिमको वातावरण क्षम्य नहुने बताएका हुन् ।
उनले यदि कसैले त्यो मनसमाय बनाएको छ भने त्यो मनसाय र दृष्टिकोण त्याग्न अनुरोध गरे । ‘बजेट निर्माणका क्रममा बजारमा केही कुराहरु बाहिर आएका छन’, उनले भने ‘यद्यपि ठोस प्रमाण आएका छैनन्, आएको खण्डमा कानुनी कार्वाही हुन्छ ।’ बजेटलाई बढी भन्दा बढी प्रभावकारी बनाउन प्रदेश सरकार लागेको र विशेषगरी भ्रष्टचारका विषयमा प्रश्न नउठ्ने मान्यताका आधारमा बजेट निर्माणमा जुटेको मुख्यमन्त्री शाहले स्पष्ट पारे।
त्यस्तै,आज एक प्रेस विज्ञप्ति जारि गर्दै मुख्यमन्त्री शाहले सुदूरपश्चिम प्रदेश सरकार भ्रष्टाचारका विरुद्ध शून्य सहनशीलताको नीति अवलम्बन गरी सुशासन, जनमुखी र जनउत्तरदायी शासन प्रणालीमार्फत विकास र समृद्धि प्रति दृढ प्रतिबद्ध रहेको बताए ।
विज्ञप्तिमा भनिएको छ,‘प्रदेशको समग्र विकास, समृद्धि, सुशासन प्रवर्द्धन, भ्रष्टाचार नियन्त्रण, योजना छनोट तथा बजेट विनियोजन र कार्यान्वयन गर्ने विषयमा हामी स्पष्ट प्रतिबद्ध छौं। सबै मन्त्रालय तथा मातहतका निकायहरूलाई समेत लागुगर्न निर्देशन दिइएको छ।’
