धनगढी । प्रेस चौतारी नेपाल कैलालीले संगठनको २८औँ स्थापना दिवसको अवसरमा पत्रकार अक्षयकोष स्थापना गरेको छ ।
पत्रकारलाई प्रोत्साहन, सम्मान र सिर्जनात्मक कार्यका लागि डेढ लाख राशिकाे अक्षयकोष स्थापना गरेकाे हाे ।
धनगढीकाे सिद्वार्थ कटेजमा आयाेजना गरिएको अक्षयकोष स्थापना तथा घाेषणा समारोहमा प्रमुख अतिथि एवंम् एमालेका केन्द्रीय उपमहासचिव लेखरान भट्टले अक्षयकोषकाे घाेषणा गरेका हुन् ।
प्रेस चौतारीमा आबद्ध पत्रकार, विभिन्न पत्रकार र सामाजिक क्षेत्रका व्यक्तिले प्रदान गरेकाे सहयाेग रकमले अक्षयकोष स्थापना गरिएको संगठनले जनाएको छ ।
बिहीबारकाे समारोहमा एक लाख ५८ हजार ३८० राशिकाे अक्षयकोष घाेषणा गरिएको छ । अक्षयकोषको सावाँ रकमबाट प्राप्त हुने ब्याजबाट पत्रकारको हकहितका पक्षमा खर्च गरिने प्रेस चौतारी कैलालीका अध्यक्ष जनकसिंह बिष्टले बताए ।
उनकाअनुसार पत्रकार दुर्घटनामा परेमा वा गम्भीर बिरामी भएमा ब्याजबाट प्राप्त रकमबाट सहयोग गरिनेछ । पत्रकारका श्रीमती वा छोराछोरीलाई समेत यस्ता समस्या परेमा सहयोग गर्न सकिने उनले जानकारी दिए । अध्यक्ष बिष्टले अक्षयकोषको रकम वृद्धि गर्न सबैलाई सहयोग गर्न आग्रह पनि गरे ।
स्थापना दिवसकै अवसरमा जिल्ला समितिले चक्र डगौरा स्मृति पत्रकारिता पुरस्कारबाट पत्रकार लिलाजंग शाहीलाई नगदसहित सम्मान गरेको छ । यस्तै युवा प्रतिभा पुरस्कारबाट पत्रकार कमल सावद सम्मानित भएका छन् ।
यो पुरस्कार यस वर्षदेखि सुरु गरिएको र हरेक वर्ष निरन्तरता दिइने प्रेस चौतारी कैलालीका सचिव दिनेश बिष्टले बताए ।
कार्यक्रमकै अवसरमा प्रेस चौतारी नेपाल सुदूरपश्चिम प्रदेशको स्मारिका विमोचन पनि गरिएको थियो । साथै कञ्चनपुर र बाजुरा जिल्लालाई उत्कृष्ट जिल्लाका रूपमा सम्मान गरिएको छ भने, तीन जना पत्रकारलाई विभिन्न विधाबाट सम्मान गरिएको छ ।
कार्यक्रममा नेकपा एमाले उपमहासचिव लेखराज भट्ट, प्रेस चौतारी सुदूरपश्चिम इन्चार्ज दिल बहादुर छत्याल, नेकपा एमाले केन्द्रीय सदस्यहरू लिला भण्डारी, सन्तोष शर्मा थापा, सुदूरपश्चिम प्रदेश सचिव रण बहादुर चन्द, उपसचिव भागरथी बिष्ट, एमाले कैलाली अध्यक्ष यज्ञराज ढुंगाना लगायतको सहभागिता रहेको थियो।
