धनगढी । नेपाल कम्युनिष्ट पार्टी एमाले यतिखेर चुनावी प्रचार प्रसार अभियानमा उत्रिएको छ । आसन्न फागुन २१ गते हुन गइरहेको प्रतिनिधि सभा सदस्य निर्वाचनाका लागि एमाले सुदूरपश्चिमभर आक्रामक रुपमा चुनाव प्रचार प्रसार अभियानमा जुटेको छ ।

कैलाली लगायत सुदूरपश्चिमका सबै निर्वाचन क्षेत्रमा एमालेका उम्मेदवारले पछिल्लो समयमा घरदैलो अभियान, टोल कमिटी भेला लगायत मतदातालाई भेटघाटन गर्ने क्रमलार्य जोड दिएका छन् ।
सोही अवसरमा शनिबार नेकपा एमाले क्षेत्र नम्बर ५ का प्रतिनिधि सभा सदस्य उम्मेदवार यज्ञराज ढुङ्गानाले सूचना प्रविधि, शिक्षा, स्वास्थ्य, रोजगारी, कृषि, पूर्वाधार र सामाजिक न्यायलाई प्राथमिकतामा राखेर चुनावी प्रतिवद्धता सार्वजनिक गरेका छन् ।

कैलाली क्षेत्र नं. ५ का मतदातामाझ आफ्नो प्रतिबद्धता पत्र सार्वजनिक गर्दै उनले धनगढी उपमहानगरपालिकालाई महानगरपालिकामा स्तरोन्नति गर्न पहल गर्ने जनाएका छन् । उनले धनगढी उपमहानगरपालिका र कैलारी गाउँपालिकाका विभिन्न वडामा इन्टरनेट तथा आईटी सेवा विस्तार, विद्यालय, स्वास्थ्य संस्था र सरकारी कार्यालयमा डिजिटल पूर्वाधार सुदृढ गर्ने योजना अघि सारे ।

स्वास्थ्य क्षेत्रअन्तर्गत नेपाल सरकारको स्वास्थ्य बीमा कार्यक्रमलाई प्रभावकारी बनाउँदै निजी अस्पतालसम्म विस्तार गर्ने, सेती प्रादेशिक अस्पताललाई सङ्घीय सरकार मातहत ल्याई स्तरोन्नति गर्ने प्रतिबद्धता उनले जनाए ।

गेटामा सञ्चालनमा रहेको शहीद दशरथचन्द स्वास्थ्य विज्ञान विश्वविद्यालयमा एमबीबीएस अध्ययन सञ्चालन र ६ सय शय्याको अस्पताल स्थापना गर्ने विषयलाई पनि प्राथमिकतामा राखिएको छ ।

त्यसैगरी महिला, बालबालिका र ज्येष्ठ नागरिकमैत्री स्वास्थ्य सेवा, थारु समुदायमा देखिएको सिकलसेल लगायत दीर्घरोग उपचारका लागि विशेष वार्ड सञ्चालन गर्ने योजना रहेको छ ।

युवा लक्षित सीपमूलक तालिम केन्द्र स्थापना, स्टार्टअप कर्जाको दायरा विस्तार तथा “एक युवा, एक रोजगार” अभियानमार्फत पाँच वर्षमा कम्तीमा पाँच हजार रोजगारी सिर्जना गर्ने लक्ष्य ढुङ्गानाले प्रस्तुत गरेका छन् । औद्योगिकरणमार्फत स्वदेशमै रोजगारी सिर्जना गर्ने र श्रमिकको न्यूनतम ज्याला प्रभावकारी कार्यान्वयन गरिने उनले बताए ।

कृषि आधुनिकीकरण, सिँचाइ विस्तार, कृषि बीमा, खाद्य प्रशोधन उद्योग स्थापना तथा भूमिहीन र सुकुम्वासीलाई लालपुर्जा वितरणको कामलाई तीव्रता दिने प्रतिबद्धता पत्रमा उल्लेख छ ।

पूर्वाधारतर्फ सडक, खानेपानी, खेलमैदान तथा सहरी विकासलाई प्राथमिकतामा राख्दै “एक घर, एक धारा” नीति पूर्ण रूपमा कार्यान्वयन गर्ने बताइएको छ ।

सामाजिक न्यायअन्तर्गत दलित, महिला, थारु, जनजाति तथा सीमान्तकृत समुदायको अधिकार संरक्षण, भाषा र संस्कृतिको जगेर्ना, योगदानमा आधारित सामाजिक सुरक्षा कार्यक्रमलाई सबै श्रमिकसम्म विस्तार गर्ने योजना रहेको छ ।

प्रतिबद्धता पत्र सार्वजनिक गर्ने कार्यक्रममा नेकपा एमालेका नेता तथा क्षेत्र नम्बर ५ को निर्वाचन परिचालन मूल समिति संयोजक नारदमुनी रानाले राष्ट्रहीतको लागि एमालेले जित्न आवश्यक रहेको बताएका थिए ।

उनले राष्ट्र र राष्ट्रियता जोगाउन एमालेको नेतृत्व सरकार आवश्यक रहेकोले नेपाली जनताको रोजाईमा एमाले नै रहेको बताए ।
कार्यक्रममा नेकपा एमालेका समानुपातिक उम्मेदवार सावित्रा घिमिरे, सुदूरपश्चि प्रदेशका सचिव रणबहादुर चन्द, पूर्व सांसद महेश्वर पाठक, पूर्व मेयर खेमराज पाण्डे, धनगढी उपमहानगरपालिकाका उप प्रमुख कन्दकला राना र कैलाली क्षेत्र नम्बर ५ का प्रचार संयोजक विष्णु चन्द लगायत धेरै नेता तथा कार्यकर्ताको सहाभागीता रहेको थियो ।