धनगढी । आसन्न प्रतिनिधिसभा सदस्य निर्वाचनका लागि नेपाली कम्युनिष्ट पार्टीका तर्फबाट कैलाली क्षेत्र नं. ५ का उम्मेदवार एवं पूर्वमन्त्री प्रेमबहादुर आलेले युवालाई स्वरोगार बनाउन सीपमूलक कार्यक्रमलाई प्राथमिकता दिनुपर्ने बताएका छन् ।

धनगढी उपमहानगरपालिकाद्वारा आयोजित ‘सीप तथा रोजगार मेला-२०८२’ को शुक्रबार अवलोकन गर्दै उनले यस्तो बताएका हुन् ।
उनले युवाहरूले विभिन्न प्राविधिक तथा व्यवसायिक सीप सिकेर स्वरोजगार एवं आत्मनिर्भर बन्न सक्ने बताउँदै यस्ता खालका तालिम तथा कार्यक्रमलाई सरकारले पनि प्राथमिकता दिनुपर्ने धारणा राखे ।

उनले वैदेशिक रोजगारीमा जानेहरूका लागि पनि सीप अनिवार्य रहेको उल्लेख गर्दै सीपयुक्त जनशक्तिले श्रमको उचित मूल्य पाउने धारणा राखे । उनले भने “सीप सिकेपछि स्वदेशमै उद्यम गर्न सकिन्छ । विदेश जाँदा पनि दक्ष जनशक्तिको माग उच्च हुन्छ र सीपअनुसारको पारिश्रमिक पाइन्छ ।”

पूर्वमन्त्री आलेले यस्ता कार्यक्रमले युवालाई आत्मनिर्भर बन्न प्रेरित गर्ने विश्वास व्यक्त गर्दै राज्यले सीप विकास र रोजगारी सृजनामा थप लगानी गर्नुपर्ने बताए ।

धनगढी उपमहानगरपालिकाद्वारा आयोजित सीप तथा रोजगार मेला २०८२ मा ७ विधाका २२ वटा तालिमहरु सञ्चालन भइरहेका छन् ।
गत माघ ५ गतेबाट सञ्चालन भएको मेला एक महिनासम्म सञ्चालन हुने आयोजकले जनाएको छ ।