धनगढी । कैलाली निर्वाचन क्षेत्र नम्बर ५ को मतगणना सुरु गर्नका लागि सर्वदलीय बैठक सुरु भएको छ । धनगढीस्थित मुख्य निर्वाचन अधिकृतको कार्यालय रहेको स्वास्थ्य तालिम केन्द्रमा केही बेरअघिदेखि बैठक सुरु भएको हो ।
यस क्षेत्रका सबै मतदान केन्द्रहरूबाट मतपेटिकाहरू सङ्कलन भई मुख्य निर्वाचन अधिकृतको कार्यालयमा सुरक्षित रूपमा राखिसकिएका छन्।
सर्वदलीय बैठकमा मतगणनाका नियमहरू, प्रतिनिधिहरूको व्यवस्थापन र समय तालिका बारे छलफल भइरहेको छ। बैठकको निर्णय अनुसार मतगणना हुनेछ।
सुदूरपश्चिम प्रदेशका नौ वटा जिल्लामा गरी कुल १६ वटा निर्वाचन क्षेत्रहरू रहेका छन्। सबै क्षेत्रहरूमा मतपेटिका सङ्कलन कार्य सम्पन्न भए पनि अहिलेसम्म प्रदेशको कुनै पनि क्षेत्रमा मतगणना भने सुरु हुन सकेको छैन।
अधिकांश क्षेत्रहरूमा अहिले सर्वदलीय बैठक बस्ने र मतगणनाको आन्तरिक तयारी गर्ने काम भइरहेको बुझिएको छ। कतिपय ठाउँमा भोलि मतगणना हुनेछ भने केही ठाउँमा राति नै मतगणना सुरु हुने सम्भावना छ।
