धनगढी । नेपालमा नयाँ सरकार निर्माण नजिकिएसँगै भारतबाट रोजगारी गरी घर फर्कने नेपालीको भीड लाग्न थालेको छ ।
कैलालीको त्रिनगर भन्सार नाका हुँदै घरफक्रने नेपालीको भीड लाग्न थालेको हो । भन्सार नाका हुँदै दैनिक दुई हजार ६ सय जना नेपाली घर फर्किन थालेका छन् ।
चैत महिनाको दुईदिनको अवधिमा मात्र ५ हजार दुई सय जना नेपाली यो नाका हुँदै नेपाल भित्रिएको प्रहरीले जनाएको छ ।
भीड हुने भएकाले धेरै ईन्ट्री नै गर्न नसकिने तथा धेरै बिहान ६ बजेदेखि भारतबाट आउने नेपालीको भीड शुरु हुने गरेको प्रस्तावित सीमा सुरक्षा बल त्रिनगर गुल्मले जनाएको छ ।
त्रिनगर सीमानाकामा भेटिएका अछाम चौरपाटीका रामबहादुर साउदले नेपालमा नयाँ सरकार निर्माणसँगै रोजगारी सिर्जना हुने बिश्वासका कारण भारतबाट फर्किएको बताए ।
करिब ४ बर्ष भारतको ठानामा काम गर्दै आएका साउदले भने ‘नेपालमा स्थायी सरकार बन्ने र नेपालमै रोजगारी पाइने बाताबरण हुन्छकी भनेर नेपाल आएको हुँ ।’
घरमा आमा पनि एक्लै भएकाले भेटघाट पनि हुने र चैते दसैँसंगै नयाँ वर्ष मनाउन पनि नेपाल फर्केको उनको भनाइ छ ।
उनले भने ‘हेरौ वातावरण कस्तो छुन्छ ? सो अनुसार भारत जानेकी नजाने निर्धारण हुन्छ ।’
रोजगारीको वातावरण नेपालमै सिर्जना भए भारतमा जानुपर्ने आवश्यक नहुने उनले बताए ।
‘म २४ वर्षको भए । आर्थिक समस्या थियो । सहयोग गर्ने कोही थिएन’ उनले भने ‘नेपालमै बसेर रोजगारी गर्ने चाहाना हुँदा पनि रोजगारी पाउन सकिएन । घरखर्च चलाउने बाध्यताका कारण रोजगारी गर्न भारत जानु परेको हो ।’
‘भारतमा चाईनिजको काम गर्थेँ । तलब १५ हजार थियो’ उनले भने ‘घरखर्च मजाले चल्ने गरेको छ ।’
त्यस्तै अछामका गोपाल साउदले आर्थिक समस्याका कारण रोजगारी गर्न भारत जानु परेको बताए ।
उनले भने ‘म भारतको ठानामा चाईनिज काम गर्दै आएको छु । आर्थिक समस्या थियो,के गर्ने घरखर्च चलाउन भारत बाहेक अर्को ठाउँ जाने विकल्प थिएन ।’
नेपालमा काम खोजेको तथा काम पाउन नसक्दा भारत जानु परेको उनले बताए ।
उनले ‘नेपालमा नयाँ सरकार निर्माण हुँदैछ । भन्ने सुनेको छु । अब हामी जस्ता युवाका लागि केही हुने विश्वास लागेको छ ।’
