धनगढी । नेकपा (एमाले) का अध्यक्ष एवं पूर्वप्रधानमन्त्री केपी शर्मा ओली पक्राउ परेको विरोधमा सुदूरपश्चिम प्रदेशका विभिन्न जिल्लामा आइतबार पनि प्रदर्शन भएको छ । पार्टीको पूर्वनिर्धारित कार्यक्रमअनुसार कैलाली र कञ्चनपुरसहितका जिल्लाहरूमा एमाले कार्यकर्ताहरूले चर्को नाराबाजीसहित विरोध प्रदर्शन गरेका हुन् ।
अध्यक्ष ओलीको तत्काल रिहाइको माग गर्दै एमाले कार्यकर्ताहरूले आज जिल्ला प्रशासन कार्यालय कैलाली अगाडि प्रदर्शन गरेका छन् । प्रदर्शनकारी र प्रहरीबिच केही बेर धकेलाधकेल समेत भएको छ ।
प्रदर्शनका क्रममा कार्यकर्ताहरूले सरकारविरुद्ध चर्का नारा लगाउँदै राजनीतिक प्रतिशोधका आधारमा अध्यक्ष ओलीलाई पक्राउ गरिएको आरोप लगाएका छन् ।
पार्टीको पूर्वनिर्धारित कार्यक्रमअनुसार सुदूरपश्चिमका सबै जिल्ला प्रशासन कार्यालयमार्फत सरकारलाई ज्ञापनपत्र बुझाउने क्रम जारी रहेको एमाले सुदूरपश्चिम प्रदेश कमिटीले जनाएको छ ।
ज्ञापनपत्रमा अध्यक्ष ओलीलाई बिना सर्त रिहा नगरे आन्दोलनलाई थप सशक्त बनाउने चेतावनी दिइएको छ ।
