धनगढी । आज बस्ने तय भएको सुदूरपश्चिम प्रदेश सभाको बैठक प्रतिपक्षी दलले बहिष्कार गर्ने भएका छन् ।
बेलुकी ५ बजे बैठक आव्हान गरिएको छ । कार्य व्यवस्था परामर्श समितिको बैठकनै नबसी समितिको बैठकको निर्णयअनुसार भनेर प्रदेश सभा बैठक आव्हान गरिएकाले बहिष्कार गर्न लागिएको नेपाली कम्युनिस्ट पार्टी (नेकपा) संसदीय दलका नेता खगराज भट्टले जानकारी दिए ।
नेकपा र अर्को प्रतिपक्षी दल राप्रपाबिच भएको छलफलमा बैठक बहिष्कार गर्ने सहमति भएको उनले बताए । सभामुख भीमबहादुर भण्डारीले कार्य व्यवस्था परामर्श समितिको बैठक बिहान ११ बजे बोलाएका थिए ।
तर बैठक बस्नुअघिनै सचिवालयबाट कार्य व्यवस्था परामर्श समितिको बैठकको निर्णयअनुसार बेलुकी ५ बजे बैठक आव्हान गरिएको भनेर प्रदेश सभा सचिवालयले सांसदहरुलाई म्यासेज पठाएको भट्टले बताए ।
‘बैठकनै नबसी बैठकको निर्णयअनुसार भनेर म्यासेज आयो । यो संसदीय प्रकृया र कार्यविधिविपरीत हो’ भट्टले भने, ‘त्यहीकारण बैठक बहिस्कार गर्ने निर्णयमा पुगेका हौँ ।’
बैठकमा मुख्यमन्त्री कमलबहादुर शाहले प्रदेश सरकारको नीति तथा कार्यक्रममाथि सदनमा भएको छलफलका क्रममा उठेका प्रश्नको जवाफ दिने र त्यसलाई पारित गर्न निर्णयार्थ प्रस्तुत गर्ने कार्यसूची छ ।
