धनगढी । समाजमा स्वीकार्यता बढ्दै गएको दाबी गरिए पनि लैङ्गिक तथा यौनिक अल्पसंख्यक समुदायले अझै पनि सम्मानपूर्ण र विभेदरहित जीवन जिउन संघर्ष गरिरहनुपरेको बताएका छन्।
धनगढीमा एकता नेपालद्वारा आयोजित “लैङ्गिक तथा यौनिक अल्पसंख्यक समुदायको सञ्चारकर्मीसँग अन्तरक्रिया कार्यक्रम” मा सहभागी समुदायका सदस्यहरूले आफूहरूले दैनिक जीवनमा भोग्नुपरेका विभेद, अपमान र चुनौतीबारे अनुभव साझा गरेका हुन्।
कार्यक्रममा बोल्दै समुदायका एक सदस्यले पहिचानकै कारण घर तथा कोठा भाडामा पाउन कठिनाइ हुने, रोजगारीका अवसरबाट समेत वञ्चित हुनुपर्ने अवस्था अझै कायम रहेको बताए। उनले समाजमा सहज रूपमा स्वीकार गरिएको अनुभूति अझै हुन नसकेको गुनासो गरे।
सहभागीहरूले पाहुनाघर, सार्वजनिक स्थल तथा कार्यस्थलमा समेत अपमानजनक व्यवहार सहनुपरेको उल्लेख गर्दै कानुनी रूपमा अधिकार सुनिश्चित भए पनि व्यवहारमा समान अवसर र सम्मान प्राप्त गर्न चुनौती रहेको बताए।
“हामी कुनै विशेष सुविधा खोजिरहेका छैनौं, केवल अन्य नागरिकसरह सम्मान, समान व्यवहार र अवसर चाहन्छौं,” एक सहभागीले भने, “पहिचानका आधारमा गरिने विभेद अन्त्य हुनु आवश्यक छ।”
अन्तरक्रियामा सहभागीहरूले लैङ्गिक तथा यौनिक अल्पसंख्यक समुदायका मुद्दा, अधिकार र उपलब्धिलाई समाजसम्म पुर्‍याउन सञ्चारमाध्यमको भूमिका महत्वपूर्ण हुने धारणा व्यक्त गरे। समुदायप्रति सकारात्मक सोचको विकास गर्न जनचेतना र संवादका कार्यक्रमलाई थप प्रभावकारी बनाउनुपर्नेमा उनीहरूले जोड दिए।
एकता नेपालका प्रतिनिधिहरूले लैङ्गिक तथा यौनिक अल्पसंख्यक समुदायले भोगिरहेका समस्या राज्य, समाज र सरोकारवाला निकायको साझा चासोको विषय बन्नुपर्ने बताए। समानता, सम्मान र अवसर सुनिश्चित गर्न सबै पक्षबीच सहकार्य आवश्यक रहेको उनीहरूको भनाइ थियो।
कार्यक्रममा एकता नेपालका प्रतिनिधि, लैङ्गिक तथा यौनिक अल्पसंख्यक समुदायका सदस्य तथा विभिन्न सञ्चारमाध्यममा आबद्ध सञ्चारकर्मीहरूको उल्लेख्य सहभागिता रहेको थियो। अन्तरक्रियामा समुदायका अधिकार, चुनौती र सम्मानजनक जीवन सुनिश्चित गर्न आवश्यक पहलका विषयमा विस्तृत छलफल गरिएको थियो।