धनगढी । राष्ट्रिय कृषि आधुनिकीकरण कार्यक्रम,कार्यन्वयन एकाइ कैलालीको अनुदानमा सञ्चालित कार्यक्रमहरुको अनुगमन गरिएको छ ।
शनिबार जिल्ला समन्वय समिति कैलालीका प्रमुख टीकाकुमारी चौधरी (भुल)को नेतृत्वमा सरोकारवाला अन्तरनिकाय संयुक्त अनुगमन टोलीले एकाइको ५० प्रतिशत अनुदानमा सञ्चालित कार्यक्रमहरुको अनुगमन गरेको हो ।
टोलीले कैलालीको धनगढी उपहानगरपालिका–१४ उर्मामा रहेको जगदम्बा एग्रो फर्म,भजनी नगरपालिका–६ नवलपुरको चक्लाबन्दीमा चैते धानखेती,जानकी गाउँपालिका–४ मुनुवामा चार पाङ्ग्रे मेसिनबाट धान रोपाइँ तथा चैते धान,बर्दगोरिया गाउँपालिका–४ मुडास्थित कुरेशी भैँसी फर्मअन्तरगत मासु निर्यातका लागि राँगा,भैसी प्रवर्धन कार्यक्रम,उद्यमशीलता विकास कार्यक्रम अन्तरगत गौरीगंगा नगरपालिका–८ लिक्मा स्थित बंगुरपालनको अनुगमन गरेको छ ।
त्यस्तै,गौरीगंगा नगरपालिका–५ स्थित आधुनिक कृषि औजार पशुपालन केन्द्र प्रालिमा मासु निर्यातका लागि राँगा,भैसी प्रवर्धन कार्यक्रम,गोदावरी नगरपालिकामा रहेको केबि एग्रोमा सञ्चालित उद्यमशीलता विकास कार्यक्रम अन्तरगत भैसीँपालन कार्यक्रमको अनुगमन गरिएको हो ।
जिल्लामा सञ्चालित ‘गहुँ सुपरजोन’,‘तेलहन जोन’,‘धान जोन’ र ‘माछा जोन’ कार्यक्रममा विभिन्न आधुनिक यन्त्र उपकरण ५० प्रतिशत अनुदानमा वितरण गर्दै आएको जनाइएको छ ।
परम्परागत खेतीलाई व्यवसायिक र यन्त्रमैत्री बनाउन चालु आवमा जानकी गाउँपालिका–४ मुनुवास्थित विज वृद्धि कृषि सहकारी संस्था लिमिटेडलाई ७५ प्रतिशत अनुदानमा चार पाङ्ग्रे धान रोप्ने यन्त्र दिइएको राष्ट्रिय कृषि आधुनिकीकरण कार्यक्रम,कार्यान्वयन एकाइ कैलालीका प्रमुख सन्जु उपाध्याय रिमालले जानकारी दिइन् ।
धान रोप्ने यन्त्रले रोपाइँमा धेरै सहज हुन थालेको सहकारी संस्थाका अध्यक्ष विजयकुमार कठरियाले बताए । उनले धान रोप्ने कामदार पाउन पनि समस्या,हुने,कामदारबाट धान रोप्दा महंगो पर्ने तथा यन्त्रले काम पनि छिटो र कम लागत हुने बताए ।
त्यसैगरी, भजनी नगरपालिका–६ नवलपुरस्थित शुभकामना सामुदायिक कृषक समूहलाई चक्लाबन्दीमा चैतेधान कार्यक्रममा कृषि यान्त्रीकरणअन्तरगत ५० प्रतिशत अनुदानमा तीन वटा पावर टिलर, आठ ओटा सिँचाइ मोटर,तीन वटा डिजल इन्जिन,एउटा रोटाभेटर, बिषाधी,डेलिभरी पाइपलगायतका सामान वितरण गरिएको कार्यालय प्रमुख रिमालले जानकारी दिइन् ।
अनुगमनपछि प्रतिक्रिया दिँदै समन्वय समिति प्रमुख भुलले राष्ट्रिय कृषि आधुनिकीकरण कार्यक्रमले समयानुकुल यन्त्र औजार वितरण गरेर कृषकलाई सहज बनाएको बताउँदै अनुगमनका क्रममा धेरैजसो किसानले अनुदानलाई सही सदुपयोग गरेको भेटिएको बताइन् ।
उनले कृषि क्षेत्रमा किसानको माग अनुसार विद्युत विस्तार हुन नसकेको र विद्युत विस्तार गर्न सके अझै सहज हुने बताइन् ।